Premer-Mınıstr oblys ákimderine qysqy jylytý maýsymyna tas túıin daıyndalýdy tapsyrdy
ASTANA. Shildeniń 20-sy. QazAqparat /Ernur Aqanbaı / - Búgin selektorlyq formatyndaǵy Úkimet otyrysynda Premer-Mınıstr Kárim Másimov oblys ákimderine aldaǵy jylytý maýsymyna tyńǵylyqty daıyndalýdy tapsyrdy.
«Barlyq ortalyq atqarýshy organdar oblys jáne Astana men Almaty qalalarynyń ákimderi búgingi otyrysta aıtylǵan olqylyqtardy eskere otyryp, jylytý maýsymyna qatysty týyndaǵan barlyq máselelerdi sheshýi tıis. Biz qys mezgiline eshqandaı túıtkildersiz kirýimiz kerek. Eń aldymen bilim berý nysandaryn qyrkúıektiń 1-ine jaqsylap daıyndaý kerek. Oqý jylynyń bastalýyna bir aıdan sál ǵana astam ýaqyt qaldy», - dedi Premer-Mınıstr.
«Oblys ákimderi Bilim mınıstrligimen birigip, jańa oqý jylyna bilim berý nysandarynyń daıyndyǵyna qatysty eshqandaı problema joq dep baıandaıdy. Alaıda, jergilikti jerlerde, qandaı da bir aýdandarda bul másele boıynsha problemalar týyndap jatady», - degen Premer-Mınıstr, oblys ákimderine qyrkúıektiń 1-inde mektepteri oqý jylyna daıyn bolmaǵan aýdandardyń ákimderin qyzmetten bosatý týraly usynys engizýdi tapsyrdy.
«Qandaı da bir jerde mektepterdiń daıyndyǵyna qatysty problema týyndasa, qandaı jaqsy ákim bolmasyn, ony qyzmetinen bosatý týraly oblystyq bilim berý basqarmasymen birigip sheshim qabyldańyzdar», - dedi Premer-Mınıstr ákimderine qarap aıtqan sózinde.
