Premer-Mınıstr mınıstrlerge úsh tapsyrma júktedi
«Elbasynyń tapsyrmasyna baılanysty negizgi baǵyttar boıynsha mınıstrlikterdiń alǵa qoıǵan jospary talqylandy. Buǵan qosymsha birqatar tapsyrma bar. Birinshi, Ulttyq ekonomıka mınıstrligine jáne ákimderge Qarjy, Bilim mınıstrlikterimen birge mektep salý men jóndeý fýnktsııalaryn olardy qarjylandyrý fýnktsııalarymen birge óńirlerge berý máselesin pysyqtaýdy tapsyramyn. Bul bıýdjet protsesterin ońtaılatyp, mektep salýdy nemese jóndeýdi jyldamdatýǵa múmkindik beredi», - dedi Úkimet basshysy.
Ekinshiden onyń aıtýynsha, medıtsına jumyskerleriniń praktıkalyq daıarlyǵyn kúsheıtý úshin Densaýlyq saqtaý mınıstrligi praktıkalyq daıarlyqqa nazar aýdara otyryp, halyqaralyq standarttar boıynsha oqytýdyń qazirgi zamanǵy baǵdarlamalaryna kóshý jóninde usynystar engizip, ákimdiktermen birge bıyl memlekettik aýrýhanalardy menshikti klınıkalyq bazalar retinde joǵary oqý oryndaryna berý máselesin pysyqtaýy tıis.
«Úshinshi, Eńbek jáne halyqty áleýmettik qorǵaý mınıstrligi Ulttyq ekonomıka, Qarjy, Bilim jáne ǵylym mınıstrliktermen birge jumys istep júrgen adamdardy úzdiksiz oqytý kesheni júıesin iske qosýdy qamtamasyz etsin. Jumys berýshilermen yntymaqtasa otyryp, salyqtyq shegerimderdi kásiporyndardyń personaldardy oqytý shyǵyndaryna qoldaný múmkindigin zerdelesin. Qaıta daıarlaý jáne biliktilikti joǵarlatý kýrstaryna aqy tóleýdiń voýcherlik negizderin qarastyrsyn. Elektrondy eńbek bırjasynyń negizinde kásiptik daǵdyǵa oqytatyn, sondaı-aq qajetti daǵdylardy úıretetin jáne alǵan daǵdylardy jumys berýshiler moıyndaıtyndaı sertıfıkat beretin oqý kýrstarynyń aýqymdy tizbesi bar ulttyq oqytýdyń onlaın portalyn iske qosýdy qamtamasyz etsin», - dedi Premer-Mınıstr.
