Premer-Mınıstr mınıstr men ákimderge astyq jınaýǵa qatysty naqty tapsyrmalar berdi
«Jalpy, egin jınaý naýqanynyń qarqyny jaman emes. Endi ony odan ári údete túsip, egin jınaý jumystaryn ýaqtyly aıaqtaý kerek. Aýyl sharýashylyǵy mınıstrligi men oblystardyń ákimderi ónimdi jınaýdy sapaly jáne ýaqytyly júrgizý jóninde barlyq qajetti sharalardy qabyldasyn», - dedi Premer-Mınıstr Úkimet otyrysynda.
A. Mamın egin jınaý kezeńinde aýyl sharýashylyǵy óndirýshilerin dızel otynymen qamtamasyz etýdiń árqashan mańyzdy ekenin atap ótti. Búginde aıtylǵan kólemge sáıkes arzandatylǵan janar-jaǵarmaı bólindi. Energetıka mınıstrligi men Aýyl sharýashylyǵy mınıstrligine aýyl sharýashylyǵy óndirýshilerin janar-jaǵarmaı materıaldarymen qamtamasyz etý máselesin turaqty baqylaýda ustaýdy tapsyrdy.
«Egin jınaýmen qatar, tıisti saqtaý jaǵdaılaryn erekshe baqylaý da mańyzdy. Elevatorlardyń ónimdi qabyldaý men saqtaýǵa daıyndyǵyna únemi monıtorıng júrgizý qajet, sondaı-aq astyqty alqaptan elevatorlarǵa úzdiksiz tasýdy qamtamasyz etý kerek. Aýyl sharýashylyǵy mınıstrligi óńirlerdiń ákimderimen birlesip, astyq qabyldaý kásiporyndarynyń astyqty saqtaýǵa, sondaı-aq dymqyl astyqty óńdeý men keptirý sharalaryn ýaqtyly júzege asyrýdy qamtamasyz etsin», - dedi Asqar Mamın.
Buǵan deıin QR Aýyl sharýashylyǵy mınıstri Saparhan Omarov Tótenshe jaǵdaı men karantın rejımine qaramastan, egin jınaý qarqyny kóbeıgenin málimdedi.
