Premer-Mınıstr: Memleket jastarǵa erekshe kóńil bólip otyr
«Memlekettik saıasattyń negizgi basymdyqtarynyń biri jastardy júıeli túrde qoldaý bolyp tabylady. Sondyqtan memlekettik jastar saıasatynyń jańa tujyrymdamasyn qabyldaý óte mańyzdy. Eń aldymen, jastardy jumysqa ornalastyrýdyń júıeli tásili qajet. Tujyrymdamada 2,3 mln-ǵa jýyq jastardy jumyspen qamtý josparlanǵan. Bul – óte mańyzdy aspekt, ony barynsha tıimdi júzege asyrý kerek», - dedi QR Premer-Mınıstri Álıhan Smaıylov Úkimettiń búgingi otyrysynda.
Premer-Mınıstr jastarǵa arnalǵan jobalar men baǵdarlamalardy iske asyrýǵa memleket erekshe kóńil bólip otyrǵanyn aıtty.
«Jastardyń mundaı baǵdarlamalarǵa qatysýyn keńeıtý NEET sanatyndaǵy jumys istemeıtinder men oqymaıtyndardyń sanyn azaıtýǵa yqpal etedi. Eldegi mundaı jastardyń úlesi 6%-ten asady. Ulytaý, Shyǵys Qazaqstan jáne Qaraǵandy oblystarynda NEET kórsetkishteri eń joǵary. Tujyrymdamada respýblıka boıynsha osyndaı jastardyń úlesin 3,5%-ke deıin tómendetý mindeti qoıylǵan. Biraq bul úshin «shablonmen» jumys isteýge bolmaıdy. Ár óńirdegi jastarmen jumys isteý ereksheligine barynsha ıkemdelý qajet», - dedi Á. Smaıylov.
Sonymen qatar Premer jastardy qoldaý sharalaryn jaqsartý, kásipkerlikke tartý, óz kásibin bastaýǵa kómektesý úshin úzbeı jumys isteý keregin aıtty.
«Osyǵan baılanysty Aqparat jáne qoǵamdyq damý mınıstrligi óńir ákimdikterimen birlesip, aqparattyq jumysty kúsheıtýi kerek. Jastarymyzdyń árqaısysyna, ásirese aýyldardaǵy jáne NEET sanatyndaǵy jastarǵa kóńil bólý qajet. Árkim tabysqa qol jetkizý, jumysqa ornalasý, kásiptik deńgeıin kóterý múmkindigin sezine bilýi kerek. Ákimdiktermen birlesip, jastar resýrstyq ortalyqtarynyń qyzmetin sapaly úılestirý kerek. Ortalyqtardyń basshylaryna naqty mindetter men KPI bekitý qajet.
Úshinshiden, qazir volonterler qozǵalysy aıtarlyqtaı jandandy. Volonterlerdi tartý aıasyn keńeıtip, jańa jobalar men aktsııalardy iske qosqan jón. Jastardy adamgershilik jáne patrıottyq rýhta tárbıeleýge, sport pen salamatty ómir saltyn nasıhattaýǵa erekshe nazar aýdarý qajet», - dedi Úkimet basshysy.
