Premer-Mınıstr Memleket basshysynyń Qazaqstan halqyna Joldaýynda júktelgen mindetterdi iske asyrýǵa dereý kirisý qajettigin atap kórsetti

Premer-Mınıstr Memleket basshysynyń QR Parlamenti palatalarynyń birlesken otyrysynda Qazaqstan halqyna Joldaýynda júktelgen mindetterdi iske asyrýǵa dereý kirisý qajettigin atap kórsetti.

K.Másimov Aýyl sharýashylyǵy mınıstrligine Indýstrııa jáne jańa tehnologııalar, Ekonomıkalyq damý jáne saýda mınıstrlikterimen birlese otyryp, eki aptalyq merzimde mal sharýashylyǵyn damytý jónindegi jobany iske asyrýdyń tetikteri men kezeńderi boıynsha usynystardy engizýdi tapsyrdy. Ol mal sharýashylyǵyn jáne bir-birimen baılanysty salalardy keshendi damytý máselesin oblystar men Astana jáne Almaty qalalary ákimderiniń qatysýymen Úkimettiń jeke otyrysynda arnaıy qaraý qajettigin atap ótti.

Indýstrııa jáne jańa tehnologııalar mınıstrligine Ekonomıkalyq damý jáne saýda, Munaı jáne gaz, Qorshaǵan ortany qorǵaý mınıstrlikterimen birlesip, 1 shildege deıin Úkimettiń qaraýyna energııa tıimdiligin arttyrýdyń Keshendi josparyn ázirlep, engizýdi tapsyrdy.

Ekonomıkalyq damý mınıstriligine oblystar men Astana jáne Almaty qalalarynyń ákimderimen birlesip, aǵymdaǵy jyldyń 1 shildesine deıin Qazaqstannyń memlekettik údemeli ındýstrııaldy-ınnovatsııalyq baǵdarlamasyn iske asyrýdy jáne ekonomıkanyń ósim núktelerin qamtamasyz etýdi eskere otyryp, aýmaqtardy damytý Baǵdarlamasynyń jobasyn Úkimettiń qaraýyna engizý tapsyryldy. Sonymen qatar, K.Másimov 2011 jyldyń 1 sáýirine deıin halyqty sapaly aýyz sýmen qamtamasyz etýdiń jańa baǵdarlamasynyń jobasyn engizýdi júktedi.

Bilim berý mınıstriligine eki aptalyq merzimde kásiptik-tehnıkalyq mamandardy daıarlaý jónindegi Ulttyq keńestiń quramy jáne onyń 2011 jylǵy jumys jospary jónindegi usynystardy engizýdi tapsyrdy.

Sondaı-aq, QR BǴM-ne bir aı merzim ishinde eldiń údemeli ındýstrııaldy-ınnovatsııalyq damýynyń memlekettik baǵdarlamasyn iske asyrýdy jáne Parlament maquldaǵan «Ǵylym týraly» QR zańynyń erejelerin esepke ala otyryp, joǵary oqý oryndarynyń ınnovatsııalyq qyzmetke kóshýdiń jospary men tetikterine, kásiptik tehnıkalyq bilim berý mamandyqtary boıynsha kásibı standarttardy ázirlep, qoldanýdyń josparyna qatysty usynystardy Úkimettiń qaraýyna usynýdy tapsyrdy. Sonymen birge, bir aı ishinde kásiptik-tehnıkalyq jáne joǵary bilim berý deńgeıinde jınaqtaýshy júıesin qoldanýǵa baılanysty usynystardy engizý tapsyryldy.

Premer-Mınıstr Bilim jáne ǵylym mınıstrligine oblystar men Astana jáne Almaty qalalarynyń ákimderimen birlesip, bilim berý nysandarynyń apatty jaǵdaıyn, oqýshy oryndarynyń tapshylyǵyn jáne boljanyp otyrǵan demografııalyq ósimdi esepke ala otyryp, respýblıkalyq bıýdjet qarajaty esebinen 200 mekteptiń jáne jergilikti bıýdjettiń esebinen 200 mekteptiń qurylysyna qajettilikti aýmaqtyq bólikte taldaý jasaýdy jáne bir aı merzim ishinde mektep qurylysynyń 2015 jylǵa deıingi kestesine qatysty usynystardy Úkimettiń qaraýyna engizýdi tapsyrdy.

Densaýlyq saqtaý mınıstrligine bir aı merzim ishinde Úkimettiń qaraýyna halyqtyń maqsatty toptarynyń arasynda ulttyq skrınıngtik zertteýler júrgizýdiń josparyn engizý tapsyryldy. Bir aı ishinde kóliktik medıtsınany damytý, onyń ishinde 50 avtoemhana, joldaǵy dárigerlik-qutqarý beketteri jáne sanıtarlyq avıatsııany 16 tikushaqpen tolyqtyrýǵa qatysty naqty usynystardy engizý júkteldi. Oblystar men Astana jáne Almaty qalalarynyń ákimderimen birlesip, aýmaqtyq bólikte 350 alǵashqy dárigerlik kómek uıymdarynyń qurylysyna qajettilikti taldaý jasap, olardyń 2015 jylǵa deıingi qurylysynyń kestesine qatysty usynystardy Úkimetke bir aı merzim ishinde engizý júkteldi.

Mádenıet mınıstrligine QR tilderdi qoldaný men damytýdyń 2020 jylǵa deıingi memlekettik baǵdarlamasyn júzege asyrý jónindegi is-sharalar josparyn ázirleýdi tezdetý tapsyryldy. Sondaı-aq, Mádenıet mınıstrligine eki apta merzim ishinde elimiz Táýelsizdiginiń 20 jyldyǵyn toılaý jónindegi jalpyulttyq is-sharalar josparyn júzege asyrýdyń tetikteri, onyń ishinde mereıtoılyq sharalarǵa ınvestorlar men otandyq bıznes ókilderiniń qatysýy máseleleri boıynsha usynystardy engizý tapsyryldy.

Eńbek jáne halyqty áleýmettik qorǵaý mınıstrligine tıisti memlekettik organdarmen birlesip, 2020 jylǵa deıingi jumyspen qamtýdyń túbegeıli jańa baǵdarlamasyn ázirleý júkteldi. Memleket basshysynyń tapsyrmasyna sáıkes, baǵdarlamada ózin-ózi jumyspen qamtyp otyrǵan, jumyssyz júrgen jáne turmysy tómen azamattardyń máselelerine nazar aýdarylýy tıis. Premer-Mınıstr bul qujattyń alǵashqy jobasy vedomstvonyń alqa otyrysynda qaralýy, sodan keıin ú.j. 8 aqpanynda Úkimet otyrysynda qaralýy tıis ekenin atap kórsetti. Ol Úkimette talqylaýdan ótkennen keıin jobaǵa qatysty usynystar men eskertpelerdi engizý úshin aýmaqtarǵa eki apta merzim beriletinin aıtty.

Sonymen qatar, Premer-Mınıstr bir aı merzim ishinde Úkimettiń qaraýyna jumyssyzdarǵa arnalǵan ýájdi sebeppen memlekettik járdemaqy engizýdi esepke ala otyryp, áleýmettik qamsyzdandyrýdyń júıesin jetildirý jóninde usynystardy engizýdi tapsyrdy.

Qarjy mınıstrligine bir aı merzimde Qarjy naryǵyn jáne qarjy uıymdaryn retteý men qadaǵalaý agenttigimen birlese shaǵyn nesıelendirý quraldaryna qoljetimdilikti keńeıtýge baǵyttalǵan keshendi is- sharalar jóninde usynystar ázirlep, engizý tapsyryldy. 2011 jyldyń 1 sáýirine deıin shaǵyn nesıelendirý tetikterin jetildirýge baǵyttalǵan zańdardyń jobasyn Úkimettiń qaraýyna engizý, qarjy jáne aýyl sharýashylyǵy mınıstrlerine qoljetimdi shaǵyn nesıelendirýdi aýyl sharýashylyǵynyń ózekti máselelerimen, onyń ishinde mal sharýashylyǵy men ósimdik sharýashylyǵyn damytý máselelerimen sabaqtastyrýdy júktedi.

Qurylys jáne turǵyn úı- kommýnaldyq sharýashylyq isteri agenttigine ú.j. 1 sáýirine deıin elimizdiń turǵyn úı-kommýnaldyq sharýashylyq júıesin modernızatsııalaýdyń túbegeıli jańa baǵdarlamasynyń jobasyn Úkimettiń qaraýyna engizýdi tapsyrdy. Sondaı-aq, K.Másimov bir aı merzimde kommýnaldyq sharýashylyq nysandary men turǵyn úılerdi jóndeý jáne qaıta jóndeýdi jekemenshik ınvestorlar men turǵyndardy qosymsha qarjylandyrý jáne jınaqtaýdy yntalandyrý tetikteri boıynsha, sondaı-aq sý sharýashylyǵy sektoryna jekemenshik ınvestorlardy tartý tetikteri boıynsha usynystar engizýdi tapsyrdy. Indýstrııa jáne jańa tehnologııalar mınıstrligimen birlese otyryp, jer asty sýlaryn paıdalaný múmkindikterin keńeıtý jóninde usynystar ázirlep, engizýdi tapsyryldy.

K.Másimov QR Prezıdenti Nursultan Nazarbaevtyń Qazaqstan halqyna Joldaýynda aıtqan tapsyrmalaryn oryndaý jónindegi 2011 jylǵy Jalpyulttyq is-sharalar josparyn qysqa merzimde ázirleý qajettiligin atap ótti. Ol mınıstrlikter men vedomstvo basshylaryna 2 aqpanǵa deıin ekonomıkalyq damý jáne saýda mınıstrligine atalmysh qujattyń jobasy boıynsha usynystar berýdi júktedi.

Sondaı-aq Premer-Mınıstr Davosta (Shveıtsarııa) búkilálemdik ekonomıkalyq forýmǵa qatysýshylarǵa arnap QR Prezıdentiniń Qazaqstan halqyna Joldaýynyń tanystyrylymy ótkendigin habarlady. Ol, sondaı-aq Qazaqstannyń Nursultan Nazarbaevtyń basshylyǵymen qol jetkizgen ekonomıkalyq kórsetkishterine jáne daǵdarysqa qarsy sharalardyń nátıjelerine álemdik sarapshylar men saıasatkerler qoǵamdastyǵynyń tarapynan zor qyzyǵýshylyq týyp otyrǵanyn atap ótti.