Premer-Mınıstr Mańǵystaýdyń áleýmettik-ekonomıkalyq máselelerin talqylady

Mańǵystaý oblysynyń ákimi Eraly Toǵjanov óńirdi áleýmettik-ekonomıkalyq damytý sharalary týraly baıandamasymen tanystyrdy.

2017 jyldyń qańtar-qyrkúıek aılarynda óńdeý ónerkásibinde óndiris kólemi 4,1%-ǵa ulǵaıtylyp, 119 mlrd teńgeni quraǵan. Oblastaǵy júk tasymaldarynyń kólemi qańtar-qyrkúıek aralyǵynda 169,7 mln tonnany quraǵan, bul 2016 jyldyń osy kezeńimen salystyrǵanda 7,5%-ǵa joǵary kórsetkish. Bıyl Mańǵystaý oblysynyń kásipkerlerine qoldaý kórsetý kartasy aıasynda 450 jańa turaqty jumys ornyn ashýmen, jalpy somasy 71,5 mlrd-tan astam teńgege jeti jobany júzege asyrý kózdelgen. Osy jyldyń basynan beri jalpy somasy 1,2 mlrd teńgege eki joba qolǵa alyndy.  

«Nurly jol» baǵdarlamasy aıasynda kóliktik-ınfraqurylymdyq damytý salasynda Quryq portyndaǵy parom kesheniniń qurylysy jalǵastyrylýda. «Shetpe - Jetibaı - Aqtaý», «Beıneý - Aqjigit - Ózbekstan Respýblıkasynyń shekarasy», «Jetibaı - Jańaózen», «Aqtaý - Kuıylys», «Fort-Shevchenko - Aqtaý jolynyń 43-shaqyrymy - Qalamqas» jáne «Fort-Shevchenko - Taýshyq-Shetpe» avtokólik joldaryn rekonstrýktsııalaý men jóndeý jumystary júrgizilip jatyr.

Óz kezeginde jurtshylyq tarapynan «Kaspıı» tuşylandyrý zaýytynyń dırektory Vladımır Mýrashko tuşylandyrylǵan sý kólemin arttyrý týraly, oblystyq ardagerler keńesiniń tóraǵasy Serikbaı Tóletov óńirdegi ekologııalyq ahýal týraly, qoǵam qaıratkeri Dorjok Seıbaǵytov iri kólik magıstraldaryn rekonstrýktsııalaý barysy týraly, Aqtaý Munaıly aýdanynyń qoǵamdyq keńesiniń tóraǵasy Tabyldy Ámirov aýyldyq dárigerler ambýlatorııalaryn damytý týraly sóz qozǵady.

Budan ózge, Túpqaraǵan aýdandyq máslıhatynyń hatshysy Aıkúmis Dosanova úsh aýysymda oqytatyn mektepter taqyrybyn kóterdi, oblystyq máslıhat depýtaty Dmıtrıı Klınchev Aqtaýdy damytýdyń bas jospary týraly, «Býzachı Opereıtıng LTD» KB bas dırektory Tszınchen Lıý jáne «Ózenmunaıgaz» AQ bas dırektory Bekzat Abaıyldanov munaı óndirý kásiporyndary men munaı servıstik kompanııalardyń qyzmetine qatysty ózekti máseleler boıynsha sóz sóıledi.

Atalǵan máselelerdi sheshý jumystarynyń jospary týraly baıandaı otyryp, QR ınvestıtsııalar jáne damý mınıstri Jeńis Qasymbek, energetıka vıtse-mınıstri Maǵzum Myrzaǵalıev, densaýlyq saqtaý vıtse-mınıstri Alekseı Tsoı, bilim jáne ǵylym vıtse-mınıstri Ashat Aımaǵambetov jáne ulttyq ekonomıka vıtse-mınıstri Serik Jumanǵarın qozǵalǵan taqyryptar boıynsha túsinikteme berip ótti.

Premer-Mınıstr keńesti qorytyndylaı kele, oblystyń jaqsy damý qarqynyn kórsetetinin, sonyń arqasynda negizgi kapıtalǵa ınvestıtsııalar men qurylys jumystarynyń kólemi sekildi damý kórsetkishteri boıynsha oń qarqynǵa ıe bolǵanyn atap ótti.

Sonymen qatar oblys basshylyǵynyń basty mindeti, ásirese jastar arasynda, jumys oryndaryn ashý jáne saqtaý ekeni tilge tıek etildi.  

Memleket bul baǵytta Ónimdi jumyspen qamtý jáne jappaı kásipkerlikti damytý baǵdarlamasynyń quraldarynan ózge, óndiristik tájirıbe, tálimgerlik ınstıtýty, mamandardy grantpen maqsatty daıarlaý jáne qaıta daıarlaý, sondaı-aq, «Jańa serpin» óńirlik baǵdarlamasyn iske asyrý sekildi qosymsha sharalardy júzege asyryp jatyr.

Sonymen qatar óńirde halyq sanynyń ósýinde joǵarǵy qarqyn belgilengen, soǵan oraı jergilikti bılik turǵyn úı jáne áleýmettik nysandar qurylysyna qatysty máselelerdi belsendi túrde sheshýi tıis. Búginde óńirdegi turǵyn úı qurylysynyń qarqyny aıtarlyqtaı joǵary, «Nurly jer» memlekettik baǵdarlamasy belsendi túrde iske asyrylýda - jyl basynan beri 665 myń m2 turǵyn úı paıdalanýǵa berildi, ósim qarqyny shamamen 36%, alaıda bul máseleni udaıy baqylaýda ustaý kerek.

Áleýmettik ınfraqurylym jaıly aıtar bolsaq, bıyl óńirde jańa toǵyz mekteptiń qurylysy bastaý aldy, olar úsh aýysymda oqytý máselesin sheshýi tıis. Olardyń basym bóligi «Nurly jol» memlekettik baǵdarlamasy aıasynda qarjylandyrylýda.

Aýyz sý tapshylyǵy máselesin sheshý aıasynda jalǵyz «Kaspıı» tuşylandyrý zaýytynda jańǵyrtýdyń birinshi kezeńi júrgizildi, sonyń nátıjesinde zaýyttyń qýattylyǵy táýligine 20 myń tekshe metr sýǵa deıin ulǵaıtyldy.