Premer-Mınıstr Mańǵystaý oblysynda qoǵam ókilderimen kezdesti
ASTANA. QazAqparat - Aımaqqa jumys sapary aıasynda Kárim Másimov Mańǵystaý oblysynyń qoǵam ókilderimen kezdesý ótkizip, ózekti máseleler jáne aımaqtyń áleýmettik-ekonomıkalyq damýynyń ósý barysyn talqylady. Bul týraly pm.kz habarlady.
Júzdesý barysynda turǵyndar Premer-Mınıstrge ǵana emes, Mınıstrler kabınetine de suraq qoıýǵa múmkindik aldy.
Kezdesýde aımaqta áleýmettik máselelerdi sheshýge, azamattardy, ásirese, jastardy jumysqa ornalastyrý máselesine barynsha kóńil bóletini aıtyldy. Oblys ákimi A.Aıdarbaev jumys oryndaryn qysqartylýyna jol bermeý boıynsha jumystar atqarylyp jatqanyn, al jobalardyń aıaqtalýyna baılanysty jumysynan bosap qalǵandardyń eńbekke ornalasýǵa tyrysatyndaryn atap ótti.
Bilim jáne ǵylym mınıstri E.Saǵadıevke kóp saýaldar qoıyldy. Atap aıtqanda, ol mektep formasy, bes kúndik oqý kestesine kóshý, oqýlyqtarmen qamtamasyz etilý týraly saýaldarǵa jaýap berdi. Sonymen qatar kezdesýge qatysýshylar mektep pen aýrýhana salýǵa qatysty máseleni kóterdi. Máselen, Munaıly aýdanynyń «Nur Otan» partııasy oblystyq fılıaly tóraǵasynyń orynbasary Q.Ońdabaev aımaqta halyq sanynyń qarqyndy ósip kele jatqanyn aıtyp ótti. Sondyqtan, ásirese, halqynyń sany jyldam artyp kele jatqan Munaıly aýdanynda úsh aýysymdy mektepterdiń bolý qaýpi bar. Mysaly, Basqudyq aýyldyq okrýginde 960 oryndyq mektepte 2 779 bala oqıdy, al 1 013 balany aýdandaǵy basqa mektepterge tasymaldaý uıymdastyrylǵan.
Sonymen qatar jas mamandardy turǵyn úımen qamtamasyz etý, sonymen qatar oblys turǵyndaryn aýyz sýmen qamtamasyz etýge qatysty ózekti máseleler kóterildi. Qoǵam ókilderimen kezdesýde ekonomıka vıtse-mınıstri A.Áriphanov, energetıka mınıstri Q.Bozymbaev, bilim jáne ǵylym mınıstri E.Saǵadıev, «QazMunaıGaz» UK» AQ basqarma tóraǵasy S.Myńbaev, aımaq ákimi A.Aıdarbaev sóz sóıledi.
«Nurly jol» jáne «Jumyspen qamtýdyń jol kartasy-2020» memlekettik baǵdarlamalary boıynsha jobalardyń júzege asyrylýy Mınıstrler kabınetiniń erekshe nazaryna alynǵany aıtyldy. Premer-Mınıstr oblys ákimdigine osy jobalarǵa bólingen qarjyny ıgerip, olardy jyl sońyna deıin aıaqtaýdy tapsyrdy.
Kárim Másimov Úkimet jastar máselelerin sheshýge arnalǵan jeke otyrys ótkizetinin habarlady.
Budan buryn, Atyraý oblysyna jumys sapary barysynda Premer-Mınıstr DSÁD mınıstri T.Dúısenovaǵa munaı servısi salasynyń jumystan bosap qalǵan jumysshylaryn jumysqa ornalastyrý boıynsha jumys tobyn qurýdy júktegen bolatyn. Sonymen qatar energetıka mınıstri Q.Bozymbaevqa qazaqstandyq munaı servısi kompanııalaryn iri munaı-gaz jobalaryna tartý boıynsha jumys toptaryn qurýdy tapsyrdy.
2016 jyldyń birinshi toqsanynda Mańǵystaý oblysynda 12 762 adam jumysqa ornalastyryldy, onyń ishinde turaqty jumys oryndarymen - 9 321 adam, maýsymdyq jumys oryndarymen - 1 620 adam, qoǵamdyq jumystar arqyly tólenetin jergilikti bıýdjet qarajaty esebinen - 759 adam, áleýmettik jumys oryndarymen - 1 062 adam qamtyldy.
Bıyl Memlekettik ındýstrıaldyq-ınnovatsııalyq damý baǵdarlamasy aıasynda aımaqta 660 jańa jumys ornyn qurýmen 11 joba júzege asyryldy.
