Premer-Mınıstr Qyzylorda men Jańatas qalasyndaǵy órtke qatysty pikir bildirdi
NUR-SULTAN. QazAqparat – QR Premer-Mınıstri Asqar Mamın Petropavl qalasynda turmystyq gazdyń jarylýy men Jambyl oblysynyń Jańatas qalasynda jáne Qyzylorda qalasynda órt shyǵý faktilerine qatysty pikir bildirdi, dep habarlaıdy QazAqparat tilshisi.
«Petropavl qalasynda turmystyq gazdyń jarylýy, sondaı-aq Jambyl oblysynyń Jańatas qalasynda jáne Qyzylorda qalasynda órt shyǵý faktileri boıynsha Іshki ister mınıstrligi qylmystyq is qozǵady, tıisti saraptamalar (órttehnıkalyq, sot-medıtsınalyq jáne jarylys-tehnıkalyq saraptamalar) taǵaıyndaldy», - delingen Úkimet basshysynyń depýtattyq saýalǵa bergen jaýabynda.
Onyń aıtýynsha, Jambyl oblysy Jańatas qalasyndaǵy órt boıynsha Jambyl oblysy tótenshe jaǵdaılar departamentiniń órtterdi zertteý jónindegi mamanynyń aldyn ala qorytyndysyna sáıkes, órttiń tehnıkalyq sebebi ashyq ottyń janǵysh materıaldarǵa (aǵash, qaǵaz, materııa, plastık jáne t.b.) taralýynan bolǵan. Órt páterdegi balalar bólmesinen shyqqan, bul balalardyń otpen oınaýynyń saldary (sirińke, ottyq jáne t.b.) bolýy múmkin.
«Tergeý is-qımyldary aıaqtalǵannan keıin (órttiń sebepterin anyqtaý) tıisti laýazymdy adamdardyń is-áreketterine baǵa beriledi jáne olardyń jaýapkershiligi anyqtalady. Órtter boıynsha qylmystyq isterdi tergeý barysy Іshki ister mınıstrliginiń erekshe baqylaýyna tur», - dedi A. Mamın.
Budan buryn habarlanǵandaı, Májilistiń jalpy otyrysynda depýtattar adam ólimine ákep soqqan Jambyl, Qyzylorda oblystarynda jáne Petropavl qalasynda bolǵan qaıǵyly oqıǵalarǵa baılanysty Úkimet basshysynyń atyna depýtattyq saýal joldaǵan bolatyn.
Osy oraıda depýtattar Prmeer-Mınıstr Asqar Mamınnen Tótenshe jaǵdaılar mınıstrligi óńirlerdiń ákimdikterimen birlesip, kópqabatty úılerge, ásirese ýaqytsha baspana men saıajaılarǵa, basqa da jaıly emes turǵyn úılerge árbir naqty jaǵdaıda kómek kórsetý turǵysynan tolyq jumystardy júrgizýdi surady.
