Premer-Mınıstr qysqy Azııa oıyndarynda Qazaqstan quramasy tabysty óner kórsetý úshin sportshylarmen tyńǵylyqty jumys isteýdi tapsyrdy

Ol bul tapsyrmany Úkimettiń búgingi otyrysynda berdi, dep habarlaıdy QazAqparat.

«Endi 1 jylǵa tolar-tolmas ýaqyttan keıin Astana men Almatyda 7-shi qysqy Azııa oıyndary ótedi. Azııa oıyndarynda bizge qarsylas komandalar Vankýverde aıaqtalǵan olımpıada oıyndarynda óte joǵary nátıjelerge qol jetkizdi. Qysqy Azııa oıyndarynda Qazaqstan quramasy jaqsy nátıjege qol jetkizedi dep, Siz moınyńyzǵa joǵary mindetteme alǵansyz. Sondyqtan sportshylarmen áli de jaqsylap jumys isteý qajet. Azııa oıyndarynda jaqsy nátıjelerge qol jetkizýimiz kerek», - dedi K.Másimov.

Osy oraıda Úkimet basshysy, sport mınıstrligine elimizdegi buqaralyq sportty damytýǵa aıryqsha kóńil bólýdi tapsyrdy. «Men Vankýver olımpıdasynyń nátıjeleri jónindegi sheteldik sarapshylardyń túsiniktemesin qaradym. Buqaralyq sportty damytýmen, sporttyq alańdardyń bolýymen baılanysty olardyń salystyrmaly taldamalary TMD aýmaǵyndaǵy bizdiń áriptesterimizdiń de, bizdiń de paıdamyzǵa shyqpaı otyr. Memleket basshysy Joldaýynda buqaralyq sportty, jergilikti jerlerdegi sportty damytýdy tapsyrdy. Bul qadam áp-sátte nátıje bermese de, onyń uzaq merzimdi perspektıvadaǵy mańyzy zor. Men Sizge buqaralyq sportty damytýǵa kóńil bólýdi tapsyramyn», dedi K. Másimov T. Dosmuhambetovke qaratyp aıtqan sózinde.

Óz kezeginde T. Dosmuhambetov aldaǵy qysqy Azııa oıyndarynda Koreıa, Qytaı jáne Japonııa sportshylarymen básekelesý qıynǵa túsetinin moıyndady. «Vankýverdegi olımpıada oıyndary Azııadaǵy sporttyń shyn máninde kúsheıgenin kórsetip otyr. Koreıa, Qytaı, Reseıdiń aldyna tústi. Japonııa da jaqsy óner kórsetti. Azııa oıyndarynda bizder úshin olarmen básekelesý qıynǵa túsedi. Deıturǵanmen biz júldeli oryndar úshin talasatyn bolamyz», dedi T. Dosmuhambetov.