Premer-Mınıstr qorshaǵan ortany qorǵaý boıynsha jol kartalaryn jandandyrýdy tapsyrdy
NUR-SULTAN. QazAqparat – QR Premer-Mınıstri Asqar Mamın qorshaǵan ortanyń lastaný deńgeıin tómendetýge arnalǵan jol kartalarynyń tolyq oryndalmaýyn synǵa aldy, dep habarlaıdy QazAqparat tilshisi.
Onyń aıtýynsha, júıeli ekologııalyq problemalardy sheshý úshin úzdik álemdik praktıkany eskerip jańa Ekologııalyq kodeks qabyldandy, onyń negizgi elementteriniń biri – iri óndiristerdiń ozyq tehnologııalardy engizýi.
«Jergilikti atqarýshy organdar qoǵamdastyqtarmen birlesip, qorshaǵan ortanyń lastaný deńgeıin tómendetýge, kógaldandyrýǵa, burynǵy lastanýlardy joıýǵa baǵyttalǵan jol kartalaryn ázirlep bekitti. Sonymen qatar bıyl óńirlik jol kartalary boıynsha 70 is-sharanyń 42-si ǵana oryndaldy. Olardyń oryndalýyn jandandyrý qajet, ásirese, Nur-Sultan qalasynda 13 sharadan tórteý ǵana oryndalǵan jáne Almatyda 13 sharadan beseýi ǵana oryndalǵan», - dep atap ótti Premer-Mınıstr Úkimettiń búgingi otyrysynda.
Sonymen birge, Úkimet basshysy birqatar máselege nazar aýdarýdy basa aıtty.
«Qazirgi kezde atmosferaǵa shyǵaryndylardy azaıtý maqsatynda iri ónerkásiptik kásiporyndar úshin ozyq qoljetimdi tehnologııalar anyqtamalyǵy ázirlenip jatyr. Osyǵan oraı Ekologııa mınıstrligine Qarjy jáne Ulttyq ekonomıka mınıstrlikterimen birlesip, osy anyqtamalyqtardy ýaqytyly ázirleýdi qamtamasyz etýdi tapsyramyn, olar el óndiristeriniń barlyǵynda eskerilýi tıis», - dep tapsyrma berdi Asqar Mamın.
