Premer-Mınıstr Keńsesiniń janynan Ortalyq kommýnıkatsııalar qyzmeti quryldy

Bul týraly búgin Úkimettiń jańa resmı ókili Erjan Ashyqbaev málim etti.

«QR memlekettik organdarynyń transfarenttiligin arttyrý jáne bıliktiń jumysy jóninde jurtshylyqqa tolyqqandy aqparat berý maqsatynda QR Prezıdenti Nursultan Nazarbaevtyń tikeleı tapsyrmasymen Premer-Mınıstr Keńsesiniń janynan Ortalyq kommýnıkatsııalar qyzmeti qurylyp, Úkimettiń resmı ókili taǵaıyndaldy»,-dedi búgin BAQ ókilderimen uıymdastyrylǵan brıfıng barysynda E. Ashyqbaev.

Onyń aıtýynsha, Ortalyq kommýnıkatsııalar qyzmetiniń maqsaty -memlekettik organdardyń aqparattyq kooperatsııasyn arttyrý arqyly buqaralyq aqparat quraldarymen jurtshylyqqa memlekettik organdardyń resmı ustanymyn qolma-qol jetkizý.

«Bul óz kezeginde memlekettik organdar men kommýnıkatsııalardyń damýyna, sondaı-aq memlekettik jáne qalalyq baǵdarlamalardyń oryndalýyn baqylaýda qoǵam róliniń artýyna óz septigin tıgizedi dep senemiz»,-dedi resmı ókil.