Premer-Mınıstr keler jyl da ońaı bolmaıtynyn aıtty

ASTANA. QazAqparat – QR Premer-Mınıstri Álıhan Smaıylov búgingi Úkimet otyrysynda ótken jyldy qorytyndylady, dep habarlaıdy QazAqparat tilshisi.

«Búgin – Úkimettiń osy jyldaǵy sońǵy otyrysy. Jalpy elimiz úshin bul jyl ońaı bolǵan joq – qaıǵyly «qańtar oqıǵasynan» bastap álemdik mańyzy bar birqatar qıyn jaǵdaılar oryn aldy. Alaıda, qıyndyqtarǵa qaramastan, halqymyzdyń yntymaǵy men aýyzbirshiliginiń arqasynda biz Qazaqstanda beıbitshilik pen tynyshtyqty saqtap qaldyq», - dedi Álıhan Smaıylov Úkimet otyrysynda.

Onyń aıtýynsha, Prezıdent Qasym-Jomart Toqaev Úkimettiń aldyna 2023 jyly jáne odan keıingi 7 jyl boıy tıimdi iske asyrylýy tıis birqatar mindet qoıǵan.

«Úkimet Prezıdentimizdiń saıası jáne áleýmettik reformalaryn iske asyrý úshin barlyq qajetti sharalardy qabyldaıdy. Kelesi jyl da ońaı bolmaıdy. Biraq biz qoıylǵan maqsattarǵa jetýimiz kerek. Ol úshin naqty josparlarymyz bar. Jańa jylda eńbekterińiz jemisti bolsyn. Barshańyzǵa zor densaýlyq, tabys, otbasylaryńyzǵa amandyq tileımin! Kele jatqan jańa 2023 jylmen quttyqtaımyn!», - dedi Álıhan Smaıylov.

Eske salsaq, buǵan jeıin Úkimettiń keńeıtilgen otyrysynda Memleket basshysy Qasym-Jomart Toqaev kelesi jyl qazirgiden de kúrdeli, qıyn bolýy ábden múmkin aıtqan edi.

Foto: primeminister.kz