Premer-Mınıstr «QazAvtoJol» basshysynyń jumysyn synǵa aldy
ASTANA. QazAqparat - Búgin Úkimet otyrysynda QR Premer-Mınıstri Baqytjan Saǵyntaev jol boıynda qyzmet kórsetý oryndaryn salýǵa jaýapty «QazAvtoJol» ulttyq kompanııasynyń basshysy Ermek Qızatovtyń jumysyn synǵa aldy, dep habarlaıdy QazAqparat tilshisi.
«Ermek Ánýarbekuly, slaıdtaryńyzda kórsetilgen ár oblystaǵy isterdiń bári osydan eki jyl buryn aıtylǵan standarttarǵa jatpaıdy. Siz eki jyl buryn osynda baıandaǵanda Qazaqstan boıynsha standarttar bekitildi, tıptik keshender bolady dep aıtqan bolatynsyz. Osy joly taǵy da Qyzylorda oblysyn kórsetip otyrsyz. Araǵa eki jyl salyp, «biz osyndaı modýldi jasadyq, endi sony bekitemiz» dep málimdep jatyrsyz. Sonda eki jyl boıy ár oblysta ózderiniń túsiniginshe jumys istegen. Bul rette standartqa saı ma nemese sáıkes kelmeı me? Ony aıtyp otyrǵan sebebim, biz bıznes ókilderimen kezdesip turamyz. Osy baǵytta kólik jáne logıstıka sharýalarymen aınalysatyn kásipkerler bar. Olardyń talaptary basqasha. Bıznesmender sizdiń kórsetip otyrǵan tıptik modýlderińizdi surap otyrǵan joq, ıaǵnı kásipkerler basqa basymdyqtarǵa nazar aýdarýda. Sizdiń túsinigińiz bir bólek, bıznestiń talaby bir bólek. Eki jyl ótkennen keıin «KazWay» (jol boıyndaǵy servıstiń modýldik pavılony) degendi jasaımyz dep kórsetip otyrsyz. Sonda eki jyl boıy ne istedik?», - dedi Baqytjan Saǵyntaev «QazAvtoJol» basshysyna qarata.
Óz kezeginde Ermek Qızatov jobalar aıaqtalýǵa jaqyndaǵanyn, oblystarmen pysyqtalǵanyn aıtyp baqty.
Alaıda Úkimet basshysy «QazAvtoJol» UK basshysynyń aıtqan ýájimen kelispedi.
«Sizder aıaqtaǵanǵa deıin, búkil oblystar ózderiniń túsiniginde salyp tastaıdy. Joldyń boıynda bos jer joq. Siz shetelge shyǵyp júrsiz, joldyń boıyndaǵy qyzmetterdiń qandaı bolatynyn kórdińiz. Qazir tanystyrǵan jumystar sizderge emes, ákimderge tıesili. Ol biz oılaǵan tıptik pavılondarǵa sáıkes kelmeıdi», - dedi Premer- Mınıstr.
