Premer-Mınıstr qazaqstandyqtardyń balalardy asyrap alýyn zańnamalyq turǵydan retteýdi tapsyrdy
ASTANA. Naýryzdyń 9-y. QazAqparat /Ernur Aqanbaı/ - Premer-Mınıstr Kárim Másimov Ádilet mınıstrligine Eńbek jáne halyqty áleýmettik qorǵaý mınıstrligimen birlesip qazaqstandyqtardyń balalar úıinen balalardy asyrap alýyn zańnamalyq turǵydan retteýdi tapsyrdy.
Ol bul tapsyrmany búgin Úkimet otyrysynda berdi, dep habarlaıdy QazAqparat.
«Memleket basshysy ótken aptada Qazaqstannyń áıelder qaýymynyń ókilderimen kezdesti. Onda óte mańyzdy másele - balalar úıinen balany asyrap alý jaıy kóterildi. Rashıd Tóleýtaıuly, Gúlshara Naýshaqyzy osy máseleni pysyqtap, meniń qaraýyma shyǵaryńyzdar. Bul máseleni zańnamalyq turǵydan retteý qajet», dedi otyrysta Úkimet basshysy mınıstrler R.Túsipbekov pen G.Ábdihalyqovaǵa qarata aıtqan sózinde. Osy oraıda, Premer-Mınıstr Prezıdenttiń áıelder qaýymynyń ókilderimen kezdesýinde osy máseleni kótergen «Qaıyrymdylyq» birlestiginiń tóraıymy Arýjan Saındy shaqyryp, tyńdaýdy, qajet bolsa bul másele boıynsha arnaıy Úkimet otyrysyn ótkizýdi tapsyrdy.
Aıta keteıik, Elbasynyń Qazaqstannyń áıelder qaýymynyń ókilderimen kezdesýinde A. Saın qazaqstandyqtardyń jetim balalardy asyrap alýyn jeńildetý úshin zańnamalyq turǵydan jaǵdaı jasaý qajettigin kótergen bolatyn. «Sheteldik azamattar bala asyrap alý úshin nege Qazaqstanǵa keletindigi jaıly oılandym. Shyn máninde osydan 100 jyl buryn shetelderde jetim balalar úıi qalypty qubylys bolatyn. Olar jetim balalardy asyrap alý jónindegi jumysty júıeli júrgizip, jaǵdaı jasady. Nátıjesinde olarda qazir balalar úıi joq. Sondyqtan da olar bizge keledi. Biz qaıyrymdylyq qorlarynyń qaýymdastyǵy aıasynda osy problemany zerttep, bizdiń elge bala asyrap alýǵa keletin elderdiń tájirıbesine saraptama júrgizdik. Bizdiń elimizdiń aımaqtarynda jetim balalardy asyrap alǵysy keletin adamdardyń tizimi bar. Sonymen bir mezgilde bizde ishi balalarǵa toly úıler bar. Bulardyń arasynda zańnama kedergi bolyp tur, zań boıynsha kóptegen balalar asyrap alýǵa jatpaıdy», dedi A. Saın kezdesýde.
Ol mysal retinde mynany aıtty. Máselen, anasy balasyn tastap, alaıda balasynan bas tartqany jóninde hat jazbaı, perzenthanadan qashyp ketetin bolsa, zań boıynsha balany asyrap alý úshin 6 aı kútýge, anasyn tabýǵa, sodan keıin baryp sot sheshim kútýge týra keledi. Bul úderis 2-3 jylǵa sozylyp ketedi. Al, adamdar bolsa balany kóbinese 1 jasqa deıin asyrap alǵysy keledi.
A. Saınnyń pikirinshe, qazaqstandyqtardyń balany asyrap alýyn jeńildetý úshin zańnamaǵa tısti ózgerister engizý qajet. Ol úshin arnaıy usynystar da daıyndalǵan.
Memleket basshysy tıisti usynystardy QR Prezıdentiniń Keńsesine berýdi tapsyrdy.
