Premer-Mınıstr Qazaqstanda balyq sharýashylyǵyn damytýdyń ózekti máselelerin talqylady
Negizgi máseleler retinde, atap aıtqanda, Jaıyq jáne Qıǵash ózenderiniń tabanyn tereńdetý boıynsha tazartý jumystarynyń toqtatylýy sebebinen balyqtardyń baǵaly tuqymdarynyń joıylyp ketý qateri, brakonerlikpen kúresý jáne balyq ınspektsııasy qyzmetkerleriniń materıaldyq-tehnıkalyq jaraqtalýynyń tómendigi máseleleri kóterildi, dep habarlaıdy pm.kz.
Keńes barysynda aýyl sharýashylyǵy vıtse-mınıstri E.Nysanbaev, qarjy vıtse-mınıstri R.Dálenov, «Jaıyq-Atyraý» bekire balyǵyn ósirý zaýytynyń dırektory Ǵ.Sársemalıev, balyq sharýashylyǵynyń ardageri B.Súleımenov sóz sóıledi.
Elimizdegi balyq sharýashylyǵynyń negizin sý qoımalarynyń balyq sharýashylyǵy qory quraıdy, oǵan Kaspıı jáne Aral teńizderiniń, Balqash, Zaısan kólderiniń, Buqtyrma, Qapshaǵaı, Shardara sý qoımalarynyń, Alakól kólder júıesiniń akvatorııalary jáne jalpy aýmaǵy 3 mln ga asatyn basqa da sý qoımalary kiredi. Munda 70-ten astam balyq túrleri mekendeıdi, olardyń ishinde kommertsııalyq turǵydan asa baǵaly balyqtar - bekire tuqymdastary, kókserke, sazan, aq amýr, dóńmańdaı balyǵy jáne basqalary bar.
«Agrobıznes-2020» memlekettik baǵdarlamasy aıasynda balyqty taýarlyq óndirýdiń jyl saıynǵy deńgeıin 2020 jylǵa qaraı 35 myń tonnaǵa deıin jetkizý kózdelip otyr.
QR AShM buıryǵymen 2016 jylǵa balyq jáne basqa da sý janýarlaryn aýlaý lımıti 61,2 myń tonna kóleminde belgilendi. Bıylǵy jyldyń birinshi jartyjyldyǵynda aýlanǵan balyq kólemi 16 myń tonnany qurady.
Qazirgi kezde baǵaly balyq túrleriniń shabaqtaryn jasandy túrde ósirýmen jáne olardy tabıǵı mekendeý ortasyna jiberýmen 7 respýblıkalyq memlekettik qazynalyq kásiporyn: Atyraý bekire balyǵy zaýyty, Oral-Atyraý bekire balyǵy zaýyty, Qapshaǵaı ýyldyryq shashý-ósirý sharýashylyǵy, Qamshylybas balyq tálimbaǵy, Petropavl balyq tálimbaǵy, Maıbalyq balyq tálimbaǵy, Qazaq óndiristik jersindirý stansasy aınalysady. Atalǵan kásiporyndar 2015 jyly balyq sharýashylyǵy sý qoımalaryna 168,4 mln astam baǵaly balyq tuqymdastarynyń shabaqtaryn ósirip, jibergen.
Qazirgi kezde Úkimet básekelestik ortaǵa birneshe balyq sharýashylyǵy zaýyttaryn berý boıynsha jumystar júrgizýde.
