Premer-Mınıstr qaza tapqan órt sóndirýshilerdiń otbasylaryna materıaldyq kómek kórsetýdi tapsyrdy
ASTANA. Aqpannyń 19-y. QazAqparat /Ernur Aqanbaı/ - Premer-Mınıstr Kárim Másimov Astanadaǵy bombapanada bolǵan órtti sóndirý kezinde qaza tapqan úsh órt sóndirýshiniń jaqyndary men týǵan-týystaryna kóńil aıtyp, Astana qalasynyń ákimine qaza tapqandardyń otbasyna materıaldyq qoldaý kórsetý týraly tapsyrma berdi,
dep habarlaıdy QazAqparat.
«Bul máseleni turaqty baqylaýda ustaý kerek. Úkimet músheleriniń atynan men qaza tapqandardyń jaqyndary men týystaryna kóńil aıtamyn. Astana qalasynyń ákimine materıaldyq qoldaý kórsetý týraly tapsyrma beremin», dedi Úkimet otyrysynda K. Másimov.
Aıta keteıik, Astanadaǵy Yqylas Dúkenuly atyndaǵy kóshedegi tehnoparktiń aýmaǵynda ornalasqan bombapananyń ishindegi bolǵan órt aqpannyń 17-si kúni shyqqan bolatyn. Búgin Úkimet otyrysynda Tótenshe jaǵdaılar mınıstri Vladımır Bojko órtti sóndirý kezinde úsh adamnyń qaza tapqany týraly aıtty. Olar Astana qalasynyń Tótenshe jaǵdaılar departamenti bastyǵynyń orynbasary polkovnık Zaıtsev, departamenttiń altynshy órt sóndirý bóliminiń bastyǵy Kákishev, arnaıy órt sóndirý bólimi qyzmeti bastyǵynyń orynbasary Ábeev. Olardyń deneleri búgin tańǵy saǵat 7-lerde tabylǵan.
