Premer-Mınıstr Kárim Másimov «Balalar aýylyn» ashty
PAVLODAR. Qarashanyń 14-i. QazAqparat /Vera Lıvıntsova/ - Premer-Mınıstr Kárim Másimov Pavlodar oblysyna jumys saparyn Kenjekól aýylyndaǵy «Balalar aýylynan» bastady.
Tul jetimder men ata-ana qamqorynsyz qalǵan balalarǵa arnalǵan otbasylyq tıptegi balalar úıi Pavlodardyń selolyq aýmaǵyndaǵy Kenjekól aýylynyń janynda salynyp otyr.
«Balalar aýyly» 70 orynǵa arnalǵan, 10 birqabatty kottedjden turady. Ár úıde jatyn bólmege qosa, sabaq daıyndaıtyn bólme, qonaqjaı, ashana, jattyǵý zaly jáne qosalqy jaılar bar. Úılerdi jylýmen óz boıleri qamtamasyz etedi», dedi Premerdi «Balalar aýlymen» tanystyrǵan oblys ákiminiń orynbasary Rysty Jumabekova.
Ákim orynbasarynyń aıtýynsha, aýdany 44 myń sharshy metrlik aýmaqta stomatologııa, em-dom, egý kabınetteri jáne naýqastarǵa arnalǵan palatalary bar medıtsınalyq blok ornalasqan. Ákimshilik ǵımaratta balalar shyǵarmashylyǵynyń stýdııasy, kitaphana, oqý jáne gımnastıkalyq zaldar, kompıýter synyby bar. Balalarǵa avtobýs ta bólingen.
Úkimet basshysy «Balalar aýylynyń» turǵyndaryna «GAZel» mıkroavtobýsyn tabys etti jáne ózin qarsy alǵan jáne Otan týraly qazaqsha óleń oqyp bergen balalarǵa alǵys aıtty.
Sapar barysynda Premer-Mınıstrge Pavlodar oblysynyń ákimi Baqytjan Saǵyntaev erip júrdi.
