Premer-Mınıstr Kárim Másimov Astana qalasynyń №2 saılaý ýchaskesinde daýys berdi

Atalǵan saılaý ýchaskesine Úkimet basshysy zaıybymen jáne kishi qyzy Saramen birge keldi.

 Ortalyq saılaý komıssııasynyń málimetterinshe, búgingi saılaýda Astana men Almaty qalalarynda saılaýshylarǵa 2 bıýlletennen al respýblıkanyń qalǵan aımaqtaryndaǵy saılaý ýchaskelerinde 3 bıýlletennen beriledi. Bıýlletenderdiń birinde saılaýshylar Májilis depýtattarynyń saılaýyna túsetin saıası partııalardyń ataýy kórsetilse, ekinshi bıýlletende azamattar oblystyq nemese qalalyq máslıhat depýtattary úshin, úshinshi bıýlletende aýdandyq máslıhat depýtattary úshin daýys beredi.

Esterińizge sala keteıik, Parlament Májilisi depýtattarynyń saılaýynda quramynda 335 ókili bar 7 saıası partııa ózara baq synasýda. Olar «Nur Otan» halyqtyq demokratııalyq partııasy, Qazaqstannyń Patrıottar partııasy, Qazaqstannyń «Aq jol» demokratııalyq partııasy, Jalpyhalyqtyq sotsıal-demokratııalyq partııasy, Qazaqstannyń kommýnıstik halyq partııasy, Qazaqstannyń sotsıal-demokratııalyq «Aýyl» partııasy jáne «Ádilet» demokratııalyq partııasy.

Saılaý komıssııasynyń málimetine qaraǵanda, K. Másimov daýys bergen №2 saılaý ýchaskesine 13 baıqaýshy tirkelgen. Olardyń arasynda EQYU, TMD baıqaýshylar mıssııasynyń, AQSh elshiliginiń, «Aqjol» partııasynyń, sondaı-aq birqatar qaǵamdyq birlestikterdiń ókilderi bar. Saǵat 9:00  kezinde atalǵan saılaý ýchaskesinde tirkelgen 2 463 saılaýshynyń 100-ge jýyǵy daýys berdi.