QARAǴANDY. QazAqparat - Premer-Mınıstri Asqar Mamın jumys saparymen Qaraǵandy oblysyna baryp, onda jańa óndiris oryndary men áleýmettik-mádenı ınfraqurylym nysandarynyń jumysyn bastap berdi. Sondaı-aq óńir turǵyndaryna memlekettik nagradalardy tabystady. Bul týraly QazAqparat primeminister.kz saıtyna silteme jasap habarlaıdy.
A. Mamın Qazaqstan Respýblıkasy Táýelsizdiginiń 30 jyldyǵyna arnalǵan saltanatty sharada sóılegen sózinde Qaraǵandy oblysynyń joǵary ekonomıkalyq áleýetke ıe ekenin jáne elimizdiń áleýmettik-ekonomıkalyq damýyna úlken úles qosyp otyrǵanyn atap ótti. 1991 jyldan bastap jalpy óńirlik ónim 24 ese ósti. Qaraǵandylyq kásiporyndar eldegi tas kómirdiń 34%-dan astamyn, temir keniniń 14,5%-yn, mys kenin óndirýdiń 28%-yn, jalpaq prokat pen marganets kenderiniń 100%-yn, tazartylǵan mystyń 82%-yn, tazartylǵan kúmistiń 32,7%-yn jáne tazartylǵan altynnyń 11,1%-yn óndiredi. Oblys QR-daǵy barlyq óńdelgen ónimniń besten bir bóligin (nemese 21%) shyǵarady jáne elimizde jetekshi oryn alatyn qýatty ındýstrııalyq ortalyq bolyp sanalady. Indýstrııalandyrý baǵdarlamasy óńirde buǵan deıin shyǵarylmaǵan, qosylǵan quny joǵary ondaǵan jańa ónim túrin óndirýdi uıymdastyrýǵa múmkindik berdi. Oblysta sheteldik seriktestermen birlesip jolaýshylar avtobýstaryn, karerlik jáne jol tehnıkasyn qurastyrý jobalary iske asyrylyp jatyr. Jyl saıyn 1100 avtobýs pen 400 birlik arnaıy tehnıka jáne arnaıy kólik shyǵarý josparlanyp otyr. Іshki jáne eksporttyq naryqtarda keıinnen ótkizý maqsatynda jylyna 3,5 mln dana jeńil, jeńil júk jáne júk kóligine arnalǵan avtomobıl shınalaryn shyǵaratyn iri joba iske asyryla bastady. Keleshekte kásiporynnyń qýatyn jylyna 9 mln shınaǵa deıin keńeıtý josparda bar.
Kólik ınfraqurylymy belsendi túrde jańǵyrtylyp jatyr, balabaqshalar, mektepter, medıtsına jáne sport obektileri salynýda. Táýelsizdik jyldary 8 mln sharshy metr turǵyn úı salyndy. Oblystyń áleýetin odan ári damytý aıasynda 2025 jylǵa deıin qurylys, metallýrgııa, hımııa ónerkásibi, energetıka, taý-ken metallýrgııa kesheni, qurylys materıaldary óndirisi, mashına jasaý jáne t. b. perspektıvaly salalarda jalpy somasy 3,5 trln teńge bolatyn 150-den astam mańyzdy ınvestıtsııalyq jobany iske asyrý kózdelgen.
Memleket basshysy Qasym-Jomart Toqaevtyń Jarlyǵyna sáıkes, QR Premer-Mınıstri A. Mamın Táýelsizdik kúnine oraı Qaraǵandy oblysynyń aýyl sharýashylyǵy jáne ónerkásip kásiporyndarynyń basshylary men jumysshylaryna, memlekettik qyzmetshilerge, bilim jáne ǵylym, densaýlyq saqtaý, mádenıet salalarynyń qyzmetkerlerine jáne kásipkerlerge memlekettik nagradalardy tabystady. III dárejeli «Barys» ordenimen «YDD Corporation» JShS quryltaıshysy Erlan Nyǵmatýlın, «Qurmet» ordenimen – Qaraǵandy qalasynyń №2 kópsalaly aýrýhanasynyń dırektory Arystan Maǵzumov, «Jáırem taý-ken baıytý kombınaty» AQ basqarma tóraǵasy Sergeı Bartosh, eńbek ardageri Erlan Smaıylov, «Qaraǵandy farmatsevtıkalyq kesheni» JShS bas dırektory Sergeı Baron, Á. Moldaǵulova atyndaǵy oblystyq olımpıada rezerviniń mamandandyrylǵan mektep-ınternat-kolledjiniń jetekshisi Erden Halılın marapattaldy. ІІІ dárejeli «Eńbek dańqy» ordenimen «ArselorMıttal Temirtaý» AQ KD «Tentek» shahtasynyń taý-ken jumysshysy Bahtııar Mýrzalın, «Qazaqmys korporatsııasy» JShS fılıaly – «Jezqazǵantústimet» ÓB kran mashınısi Ulmash Tańqybaeva, «Qurylysmet» JShS elektr dánekerleýshisi Rınat Haırýllın marapattaldy. «Eren eńbegi úshin» medalimen «Mıras» ShQ basshysy Sámet Babaqov, Qaraǵandy akademııalyq mýzykalyq komedııa teatrynyń ártisi Anna Bespalova, Qaraǵandy oblysy ishki saıasat basqarmasynyń «Rýhanı jańǵyrý» óńirlik jobalyq keńsesiniń basshysy Aıtbaı Jumaǵulov, «Suńqar 2015» JShS basshysy Vıktor Letýta marapattaldy. «Shapaǵat» medalimen Qaraǵandy qalasynyń №5 emhanasynyń dırektory Maral Baıazıtova jáne professor H. J. Maqajanov atyndaǵy kópsalaly aýrýhananyń neırohırýrgııa ortalyǵynyń jetekshisi Ǵabıt Mahambaev marapattaldy. QR Qurmet gramotasy Úshtóbe tirek mektebiniń dırektory Sáýle Artyqbaevaǵa tabystaldy. Jumys sapary barysynda Úkimet basshysy «Forever Flourishing (Middle Asia) Pty Ltd» JShS jobasynyń II kezeńi – bolat prokaty men shvellerler shyǵarý jelisin iske qosý rásimine qatysty. Óndiris qýaty jylyna 90 myń tonna ónimdi quraıdy. Joba elimizdiń qurylys salasyn bolat prokatymen qamtamasyz etýge jáne óńdeý ónerkásibiniń eksporttyq áleýetin arttyrýǵa múmkindik beredi. Premer-Mınıstr Saran qalasyndaǵy «Saran» ındýstrııalyq aımaǵyna baryp, onda «Allur» jáne «Tatneft» tobynyń jylyna 3,5 mln shına shyǵaratyn «KamaTyresKZ» shına zaýytyn salý jónindegi birlesken jobasynyń iske asyrylý barysymen tanysty. «Tatneft» JAQ bas dırektory Naıl Maganov búgingi kúni jobalaýdyń 78%-ǵa jáne qurylys-montajdaý jumystarynyń 20%-ǵa oryndalǵanyn baıandady. Qurylysty 2022 jyldyń IV toqsanynda aıaqtaý josparlanǵan. Kásiporyn 1100-den astam jańa jumys ornyn ashady. Úkimet basshysyna Reseı Federatsııasynyń eń iri shına ónerkásibi kásipornynda Nıjnekamskide (Tatarstan) oqyp jatqan bolashaq zaýyt mamandary shyǵarǵan alǵashqy shına kórsetildi. Sondaı-aq A. Mamın aýdany 12 myń sharshy metrge jýyq jańa Oqýshylar saraıyna bardy, onda balalardyń ǵylymı-tehnıkalyq, mýzykalyq-estetıkalyq, psıholıngvıstıkalyq, kórkemdik jáne basqa da baǵyttaǵy úıirmelerge qatysýy úshin jaǵdaılar jasalǵan.
