Premer-Mınıstr Qaraǵandy oblysynyń jastarymen kezdesti
ASTANA. QazAqparat - Búgin QR Premer-Mınıstri Baqytjan Saǵyntaev Memleket basshysynyń tapsyrmasy boıynsha Qaraǵandy oblysyna jumys sapary aıasynda oblystyń JOO men kolledjderiniń stýdentterimen, «Serpin» baǵdarlamasy boıynsha bilim alýshylarmen, stýdentter uıymdarynyń kóshbasshylarymen, JOO rektorlarymen, kolledjderdiń dırektorlarymen kezdesti. Bul týraly primeminister.kz habarlaıdy.
Kezdesý barysynda Memleket basshysynyń Joldaýlarynda, «Prezıdenttiń bes áleýmettik bastamasynda» qarastyrylǵan jańa ekonomıkaǵa mamandardy daıarlaý, bilim berýdiń qoljetimdiligi men sapasyn arttyrý, stýdent jastardyń ómir súrý jaǵdaılaryn jaqsartý máseleleri talqylandy.
B. Saǵyntaev kezdesýdi asha otyryp, ár óńirge jumys saparlary barysynda mindetti túrde jumys isteıtin jastarmen jáne stýdenttermen kezdesetinin aıtyp ótti. Qaraǵandy óńiriniń stýdentteri árqashan jańa ıdeıalar usynýmen jáne zııatkerlik qundylyqtarymen erekshelenedi.
Baqytjan Saǵyntaev «Prezıdenttiń bes bastamasyn» júzege asyrý úshin Úkimet naqty is-sharalardy jáne iske asyrý merzimderin qamtıtyn Jol kartasyn qabyldaǵanyn aıtty. Elimizdiń barlyq óńirlerinde áleýmettik bastamalardy júzege asyrýǵa qatysty jumystar bastaldy. Alǵa qoıylǵan tapsyrmalardy oryndaý boıynsha barlyq qajetti sharalar qabyldanyp jatyr. B. Saǵyntaev qazirgi kezde Úkimet eńbek naryǵynyń ınfraqurylymyn jańǵyrtý boıynsha jumys júrgizip jatqanyn atap ótti.
Eńbek jáne halyqty áleýmettik qorǵaý mınıstri Mádına Ábilqasymova atalǵan jumys týraly tolyǵyraq baıandady, bilim jáne ǵylym vıtse-mınıstri Bıbigúl Asylova «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» atty Prezıdenttiń úshinshi bastamasyn iske asyrý boıynsha atqarylyp jatqan jumystar týraly málimdedi, Qaraǵandy tehnıka-qurylys kolledjiniń dırektory S. Balabekova kolledjde áleýmettik bastamalardy iske asyrý men ınklıýzıvti bilim berýdiń qoljetimdiligi týraly aıtyp berdi.
Qaraǵandy joǵary polıtehnıkalyq kolledjiniń stýdenti S. Normatov jańa ekonomıka jaǵdaıynda mamandardy daıarlaý úshin Worldskills International qozǵalysynyń mańyzdylyǵy týraly aıtty. Qosarly bilim berý, óndiristik tájirıbeden ótý, kolledj túlekteriniń jumysqa ornalasýy týraly Qaraǵandy kásiptik-tehnıkalyq kolledjiniń óndiristik oqytý sheberi K.Turǵambek baıandady. Qaraǵandy tehnıkalyq ýnıversıtetiniń 3 kýrs stýdenti J. Arǵynbaı «Serpin» jobasy aıasynda turǵyn úımen qamtamasyz etý, jumyspen qamtý máseleleri jóninde sóıledi. E. Bóketov atyndaǵy Qaraǵandy memlekettik ýnıversıtetiniń 2 kýrs stýdenti O. Kalmykova bilim sapasyn saqtandyrý máseleleri týraly aıtty.
Talqylaý qorytyndysyn shyǵara otyryp, Premer-Mınıstr osy saladaǵy birqatar ózekti máselelerge nazar aýdardy. B. Saǵyntaev aldymen Memleket basshysynyń negizgi salalardyń básekege qabilettigin arttyrý arqyly ekonomıkalyq ósimniń jańa modelin damytý týraly júktegen mindetin eske saldy.
Sondaı-aq, Baqytjan Saǵyntaev sheteldik ınvestorlardyń óńirlerde salyp jatqan jańa kásiporyndaryna qajetti mamandardy daıyndaýdyń mańyzdylyǵyna nazar aýdaryp, tehnıkalyq mamandyqtarǵa degen suranysty zerdeleý úshin JOO-lar men kolledjderge osy óndiristerdiń atsıonerlerimen baılanys ornatýdy tapsyrdy.
Premer-Mınıstr mysal retinde munaı-gaz sektoryna mamandardy daıyndaıtyn Atyraý oblysyndaǵy kolledjderdiń biriniń tabysty tájirıbesin atap ótti. Osyǵan baılanysty B. Saǵyntaev Qazaqstannyń barlyq oblysynda osyndaı kolledjderdi ashý jónindegi Úkimettiń sheshimi týraly aıtyp berdi.
Taqyrypty jalǵastyra kele, Baqytjan Saǵyntaev árbir óńirde stýdentterdi daıyndap jatqan tehnıkalyq mamandyqtardyń araqatynasy qajettilikterge saı kelýi tıis ekenin atap ótti. Eńbek naryǵyn únemi zerdeleý qajet, stýdentterge oqýlary aıaqtalǵannan keıin jumysqa ornalasý úshin bos oryndar týraly aqparat berip otyrý kerek.
Máseleni talqylaý qorytyndysy boıynsha Premer-Mınıstr mınıstrlerge, oblys ákimine barlyq qozǵalǵan máselelerdi baqylaýǵa alýdy tapsyrdy.
Anyqtama: Eske sala keteıik, búgin jumys sapary aıasynda Premer-Mınıstr Baqytjan Saǵyntaev Qaraǵandy joǵary polıtehnıkalyq kolledjine baryp, ondaǵy jumyspen tanysty. Qaraǵandy joǵary polıtehnıkalyq kolledji 1931 jyly qurylǵan. Qazirgi tańda kolledjde 17 túrli mamandyqtar oqytylady. Budan ózge, aqparattyq qaýipsizdik, mobıldi baılanys, mehatronıka jáne gaz sharýashylyǵy baǵyttaryn ashý kózdelgen. Basqa qalalardan kelgen stýdentterge arnalǵan 80 oryndyq eki qabatty jataqhana jáne 150 oryndyq «Jastar úıi» bar.
