Premer-Mınıstr kandıdatýrasyn taıaý kúni Prezıdentke usynamyz – Erlan Qoshanov

ASTANA. QazAqparat – Premer-Mınıstr kandıdatýrasy taıaý kúnderi Memleket basshysyna usynylady. Bul týraly Májilis tóraǵasy Erlan Qoshanov aıtty, dep habarlaıdy QazAqparat tilshisi.

«Taıaý kúnderi usynylady. Ýaqyty kelgende bilesizder. Qazir men ony ashyp aıta almaımyn. Memleket basshysyna kandıdatýrany (Premer-Mınıstr kandıdatýrasy) taıaý kúnderi usynatyn bolamyz. Múmkin erteń ne arǵy kúni. Qazir protsedýrasyn pysyqtap jatyrmyz. Prezıdentpen kezdesýde usynatyn shyǵarmyz jáne jalpy otyrysta kelisimimizdi beremiz», - dedi Májilis tóraǵasy BAQ ókilderiniń saýalyna oraı.

Erlan Qoshanov dál qazir Úkimet basshysyna myna kandıdatty usynamyn dep aıtý orynsyz bolatyndyǵyn basa atap ótti.

«Partııa tóraǵasy retinde ol - úlken jaýapkershilik. Partııa fraktsııasynda aqyldasýymyz kerek. Sodan keıin men sizderdiń aldylaryńyzǵa shyǵyp ne bolmasa tıisti protsedýralar arqyly saýaldaryńyzǵa jaýap beremin», - dedi Májilis tóraǵasy.