Premer-Mınıstr K.Másimov QR Úkimetine birqatar tapsyrmalar berdi

Bul týraly primeminister.kz saıtynda habarlandy.

Kún tártibin qaramas buryn K.Másimov birneshe ózekti máselege nazar aýdardy. Atap aıtqanda, Mádenıet jáne sport mınıstrligine Ulttyq olımpıada komıtetimen birge elimizdiń quramasyn aldaǵy Rıo-de-Janeıroda ótetin Olımpıada Oıyndaryna daıyndyǵy máselesin pysyqtaý tapsyryldy.

 «Bizdiń sportshylar osy synaqtan súrinbeı ótýi úshin barlyǵyn jasaýymyz qajet», - dep atap ótti K.Másimov jáne dopıng-testter ótkizý úshin zamanaýı zerthanalar satyp alýǵa qarajat qarastyrýdy tapsyrdy.

Sondaı-aq Kárim Másimov Ońtústik Qazaqstan jáne Jambyl oblystaryndaǵy shegirtkeniń taralýyna baılanysty jaǵdaıdy synǵa aldy.

Óz kezeginde, vıtse-premer - aýyl sharýashylyǵy mınıstri Asqar Myrzahmetov ońtústikte jándikterdiń paıda bolýy tabıǵı qubylysqa jáne alqaptardy óńdeý ýaqtyly júrgizilmeýine baılanysty ekenin túsindirdi. «Bıyl qys merzimi jyly boldy jáne kóktem erte keldi. Osy rette shegirtke tuqymdastary 15-20 kúnge erte jetildi. Sondyqtan bul faktordy eskermegennen keıin, bul baǵytta jasalatyn qyzmetterge konkýrstar der kezinde ótkizilmedi», - dep túsindirdi vıtse-premer.

Úkimet basshysy aýyl sharýashylyǵy zııankesterimen kúres boıynsha sharalar qabyldap, qalyptasqan jaǵdaıǵa jaýaptylardy jazalaýdy tapsyrdy.

Budan ózge, vıdeoselektor arqyly K.Másimov Almaty ákimi Baýyrjan Baıbekke jaqynda jaýǵan jaýynnyń nátıjesinde qalany sý basýyna qatysty jumystaǵy kemshilikterdi atap kórsetti.

B.Baıbektiń málimetinshe, aqpan men naýryz aralyǵynda kommýnaldyq qyzmetter jalpy uzyndyǵy 188 km bolatyn ózenderdi, arnalar men aryq jelilerin tazalaǵan. 5 myńnan astam tekshe metr qar, 17 myńnan astam tekshe metr qatty turmystyq qaldyq shyǵarǵan. Sonymen qatar, tek mamyr aıynda ortasha norma - 108 mm kezinde 200 mm jaýyn-shashyn tústi, ıaǵnı normadan eki esege asyp túsken, al 17 maýsymda aılyq norma - 60 mm kezinde 3 saǵattyń ishinde 47 mm, al taýly jerlerde 57 mm deıin jaýyn-shashyn jaýǵan.

«Sońǵy ret mundaı jalpy normadan aýytqyǵan jaǵdaı 1957 jyly boldy, ol kezde 64,8 mıllımetr jaýyn-shashyn tústi. Sol sebepti 17 maýsymda qala aýmaǵynda 94 sý basý oqıǵasy oryn aldy», - dedi júrgizilgen jumys nátıjesinde keshke qaraı sý basqan negizgi jerler tazalanyp, tańǵa qaraı jalpy qala boıynsha barlyq jumystar aıaqtalǵanyn aıtyp ótken Almaty ákimi.

«Taıaý arada sizderge barýdy josparlap otyrmyn. Sizdiń jańaǵy aıtqandaryńyzdy óz kózimmen kórip shyqqym keledi», - dedi atalǵan máseleni baqylaýda ustaýdy tapsyrǵan Úkimet basshysy.

Kún tártibin qaraý aıasynda QR ulttyq ekonomıka mınıstri Qýandyq Bıshimbaev Memleket basshysynyń tapsyrmasymen jasalǵan 2016-2017 jyldary ekonomıkalyq ósimdi yntalandyrý jáne jumyspen qamtamasyz etý boıynsha qosymsha sharalar Josparyn tanystyrdy.

Onyń aıtýynsha, aǵymdaǵy jyldyń sońyna qaraı ekonomıkanyń oń ósimin qamtamasyz etý úshin úsh baǵyt boıynsha sáıkes sharalar qalyptastyrylǵan. Birinshi baǵyt aıasynda óndirý kólemin arttyrý jáne munaıdy qaıta óńdeý, kómir óndirý, «SSTBÓ» AQ temir kenin Qytaı men Reseıge jetkizý, otandyq kásiporyndardy júkteýdi jáne jumyspen qamtýdy saqtaý boıynsha sharalar qarastyrylǵan.

Ekinshi baǵyt «Nurly jol» Memlekettik baǵdarlamasy jáne 2016 jylǵy Daǵdarysqa qarsy qosymsha sharalary jospary aıasynda josparlanǵan qarajatty paıdalanýdyń tıimdiligin arttyrýǵa baǵyttalǵan. Sonymen, 155 mlrd. teńge somasyndaǵy ýaqytsha erkin qarajat aınalym kapıtalyn, «Báıterek» UBH» AQ arqyly óńdeý ónerkásibin eksport aldy jáne eksporttyq nesıeleýdi qarjylandyrýǵa baǵyttalady, dedi Ulttyq ekonomıka mınıstrliginiń basshysy.

«Ekonomıkanyń ósimine jyldam áser etý úshin aǵymdaǵy jyldyń ekinshi jartyjyldyǵynda ishki suranysty yntalandyrýǵa QR Úkimetiniń arnaıy rezervi esebinen 91,5 mlrd. teńge baǵyttalatyn bolady», - dedi Q.Bıshimbaev. Atalǵan qarajat TKSh nysandaryn aǵymdaǵy jóndeýge, aýyldardaǵy, aýyl okrýterindegi, aýdandyq mańyzdaǵy qalalardyń ınfraqurylymyna jáne kóriktendirýge; JTQ arnap ınfraqurylym júrgizýge; «BJK-2020» baǵdarlamasy aıasynda bıznes jobalaryna ınfraqurylym júrgizýge; aýyldy eldi mekenderdi keń jolaqty Internet jelisimen qamtamasyz etý boıynsha jobany júzege asyrýǵa, sondaı-aq basqa da is-sharalarǵa baǵyttalady.

Jospardyń úshinshi baǵyty - «Nurly jol» Memlekettik baǵdarlamasy aıasynda ınfraqurylymdyq jobalardy jáne ekonomıkanyń basymdyqty salalaryndaǵy ınvestıtsııalyq jobalardy júzege asyrýdy jedeldetý.

«Boljanǵan sharalardy eskere otyryp, aǵymdaǵy jyldyń maýsym-shildesinde ekonomıka oń aımaqqa shyǵady, al 2016 jyldyń qorytyndysy boıynsha ósimniń josparlanǵan deńgeıine shyǵady dep kútilýde», - dep túıindedi Q.Bıshimbaev.

Indýstrıaldy-ınnovatsııalyq damytý memlekettik baǵdarlamasyn júzege asyrý jáne jandandyrý máselesi boıynsha ınvestıtsııalar jáne damý mınıstri Áset Isekeshev málimdedi.

«6 jylda Indýstrıalandyrý kartasy boıynsha 898 joba paıdalanýǵa berildi, onyń ishinde 2015 jyly 128 joba. Olardyń 80%-y jańadan qurylǵan óndiris jobalary bolsa, qalǵan 20%-y jumys istep turǵan kásiporyndardy jańǵyrtý men keńeıtýge baǵyttalǵan. 2015 jylǵy JІÓ ósiminiń úshten biri karta jobalarynyń esebinen alyndy», - dedi Á.Isekeshev.

Onyń aıtýynsha, jalpy Indýstrıalandyrý kartasynyń jobalar arqyly buryn Qazaqstanda óndirilmegen ónimniń 500 túri shyǵarylǵan. Engizilgen jobalardyń 70% turaqty júktemege ıe, 74 joba tómen júktemede jumys isteýde, 21 joba toqtap tur.

«2016 jyly 120 jobany engizý josparlanǵan. Jalpy Indýstrıalandyrý baǵdarlamasy ekonomıkada turaqtandyrýshy ról atqardy. Eger 2010-2014 jyldary Indýstrıalandyrý kartasynyń jobalary barlyq ónerkásip óndirisiniń 10%-yn berse, daǵdarystyń kúsheıýimen bul jobalar turaqtylyǵyn kórsetip otyr. 2016 jyldyń 1 toqsanynyń qortyndysy boıynsha bul jobalar óndiretin barlyq ónimniń 20%-yn berip úlgerdi», - dep basa aıtty IDM basshysy.

Talqylaý qorytyndysyn jasaǵan Premer-Mınıstr Qazaqstandy odan ári damytýdaǵy IIDMB-nyń mańyzdy rólin atap ótti.

«Osy baǵdarlamanyń kómegimen, ásirese bes ınstıtýtsıonaldy reforma men 100 naqty qadamnyń kómegimen biz qazir turǵan jolaqtan ótýimiz kerek. Bul kásiporyndar salýǵa qatysty másele emes, bul Prezıdent aıtqan bizdiń odan ári damýymyzdyń fılosofııasy máselesi. Bul zor zııatkerlik jáne uıymdastyrý kúshterin talap etedi, alaıda ony iske asyrý siz ben bizdiń qolymyzdan keletinine senimdimin», - dep túıindedi K.Másimov.