Premer-Mınıstr Indýstrııalandyrý kartasy aıasynda jańa jobany qolǵa alýdy usyndy

ASTANA. 24 qyrkúıek. QazAqparat - Úkimettiń búgingi otyrysynda Premer-Mınıstr Serik Ahmetov elimizde jańa jobany bastaýdy usyndy.

«Men saǵatyna 100 gıgo-kalorııaǵa deıin jylý beretin qazandyqtardy qaıta jabdyqtaýdy qoldaımyn. Bul máseleni sheshetin kez keldi. Sonaý keńestik zamanda salynǵan qazandyqtar 40-50 jyldan beri jumys istep keledi. Shyny kerek, sonyń barlyǵy eskirdi. Qazir ondaı qazandyqtardy qaıta jabdyqtaý qajet. Ásirese, shaǵyn qalalar men kentterde tıisti jumystardy júrgizý kerek», - dedi S.Ahmetov. Osy oraıda ol kómiri eki ese az jaǵylatyn jańa qazandyqtardyń bar ekendigin eske salyp: «Osynyń barlyǵyn Údemeli ındýstrııalyq-ınnovatsııalyq baǵdarlama aıasynda qarap, qajet bolsa, tıisti kásiporyndarǵa qoldaý jasaıyq. Olar jańa qondyrǵylardy (qazandyqtar - avt.) shyǵarýdy bastasyn. Sony Indýstrııalandyrý kartasyna kosaıyq. Negizi, ondaı kásiporyndar úshin ondaǵan jyldarǵa jumys tabylady. Sebebi bizde barlyq qazandyqtardyń 80 paıyzyn qaıta jabdyqtaý qajet», - dedi Úkimet basshysy. Osyǵan baılanysty Premer-Mınıstr QR Indýstrııa jáne jańa tehnologııalar mınıstrligi men QR Óńirlik damý mınıstrligine tıisti usynystardy daıarlaýdy tapsyrdy.