Premer-Mınıstr: Halyqty sapaly kómirmen qamtamasyz etýge ákimderi tikeleı jaýapty
ASTANA. QazAqparat - QR Premer-Mınıstri Baqytjan Saǵyntaev kómirdiń ishki naryǵynda ótken jylǵydaı jaǵdaıǵa jol bermeýdiń amaldaryn atady, dep habarlaıdy QazAqparat.
«Jalpy, jylytý maýsymyna daıyndyq jumystary júrip jatyr, degenmen qatar bul baǵyttaǵy sharalardy jedeldetý qajet. Áleýmettik sala nysandary men turǵyn úılerdi jylýmen, energııamen ýaqytyly ári sapaly qamtamasyz etýge ákimder jaýapty ekenin taǵy da eske salamyn. Tutynýshylardy kómirmen qamtamasyz etýdi máselesin erekshe nazarǵa alý kerek», - dedi Premer-Mınıstr Úkimet otyrysynda.
Osy oraıda B. Saǵyntaev Úkimet tarapynan ishki naryqty kómirmen úzdiksiz jabdyqtaý úshin barlyq qajetti sharalar qabyldanǵanyn, sondaı-aq vagon tapshylyǵy boıynsha máseleler tolyǵymen sheshilgenin atap ótti.
«Búgingi kúni kómirdi jóneltýge qatysty problema joq. Sondyqtan halyqty sapaly kómirmen qajetti kólemde ýaqytyly qamtamasyz etýde jáne oǵan baǵa belgileý úshin óńirlerdiń ákimderi tikeleı jaýapty. Kómirdiń ishki naryǵynda ótken jylǵydaı jaǵdaıǵa jol bermeý úshin óńirler ákimderi eki apta merzimde kómirdi daıarlaý men satý beketteriniń jaı-kúıine, kómirdi jetkizý kestelerine, otyn baǵasynyń negizdiligi men sapasyna tekserý júrgizýi kerek. Qajet bolǵan jaǵdaıda bul jumysqa ortalyq memlekettik organdardyń tıisti aýmaqtyq bólimsheleri men «Atameken» UKP ókilderin qatystyrylýy tıis», - dep túıdi Úkimet basshysy.
Osy oraıda Baqytjan Saǵyntaev bul baǵyttaǵy jumystardy birinshi orynbasary Asqar Mamınge baqylaýǵa alýdy júktedi.
Budan buryn habarlanǵandaı, búgin Úkimet otyrysynda QR Investıtsııalar jáne damý mınıstri Jeńis Qasymbek el óńirlerin kómirmen qamtamasyz etý barasy jaıynda baıandady.
