Premer-Mınıstr halal ónimderin damytýdyń jol kartasyn Úkimetke engizýdi tapsyrdy
NUR-SULTAN. QazAqparat – Búgin Úkimet otyrysynda Premer-Mınıstr Asqar Mamın halal ónimderi eksportyn damytýdy tapsyrdy , dep habarlaıdy QazAqparat tilshisi.
«Álemdik úrdisterdi eskere otyryp, halal ónimderi eksportyn damytý qajet. Otandyq halal ónimderiniń musylman naryǵynda joǵary básekege qabilettiligi osy ónimderdiń halyqaralyq talaptarǵa sáıkestigin baqylaý júıesin damytýdy qajet etedi. Aýyl sharýashylyǵy mınıstrligine múddeli memlekettik organdarmen birlesip, bıylǵy 15 tamyzǵa deıin halal ónimderin damytý jóninde jol kartasyn Úkimetke engizýdi qamtamasyz etýdi tapsyramyn», - dedi A. Mamın.
Úkimet otyrysy barysynda Aýyl sharýashylyǵy mınıstri Saparhan Omarov qazirgi ýaqytta halal ónimderin óndirýdi damytýdyń jol kartasyn kelisý aıaqtalýǵa jaqyndaǵanyn atap ótti.
