Premer-Mınıstr: Eldi mekender mańyndaǵy jerlerdi qaıtaryp alý mańyzdy
«Jaıylymdyq jermen qamtamasyz etpeıinshe mal sharýashylyǵyn tolyqqandy damytý múmkin emes. Bul – elimizdiń azyq-túlik qaýipsizdigine tikeleı qatysy bar asa mańyzdy másele. Osyǵan baılanysty, zańsyz berilgen, bos jatqan jerlerdi qaıtaryp alý jónindegi arnaıy Komıssııa byltyrǵy sáýir aıynan beri jumys istep keledi. Nátıjesinde ótken jyly memleket paıdasyna 5,2 mln gektar jer qaıtaryp alyndy. Onyń ishinde 4,8 mln gektary – jaıylymdyq jerler», - dedi Premer-Mınıstr Úkimettiń búgingi otyrysynda.
Bul jumystarǵa Memleket basshysynyń Agroónerkásip salasyndaǵy mıkro jáne shaǵyn bıznes sýbektilerine qatysty tekserý júrgizýge múmkindik beretin Jarlyǵy erekshe serpin bergen.
«Bul jumys bıyl da jalǵasady. Bıyl taǵy 5 mln gektar jerdi qaıtaryp alý josparlanýda. Bul oraıda eldi mekender mańynda ornalasqan aýyl sharýashylyǵy qurylymdarynyń jerlerin qaıtaryp alý mańyzdy. Olardy qoǵamdyq paıdalanýǵa nemese jeke qosalqy sharýashylyq kooperatıvterine berý qajet. Qoldanystaǵy zań buǵan múmkindik beredi. Sonymen qatar, eldi mekender mańynda jaıylym jerleriniń az bolýy jeke qoldaǵy mal basynyń ósýine shekteý qoıyp otyr. Sondyqtan jaıylymdardy tıimdi paıdalaný úshin jaǵdaı jasaý qajet», - dedi Á. Smaıylov.
Foto: primeminister.kz
