Premer-Mınıstr ekonomıkalyq ósimdi qamtamasyz etýge qatysty birqatar tapsyrmalar júktedi
ASTANA. 23 shilde. QazAqparat - Búgin elimizdiń birinshi jartyjyldyǵyndaǵy áleýmettik-ekonomıkalyq damý qorytyndylary talqylanǵan Úkimet otyrysynda Premer-Mınıstr Serik Ahmetov ekonomıkalyq ósimdi qamtamasyz etýge qatysty birqatar tapsyrmalar júktedi.
Atap aıtqanda, Úkimet basshysy Ekonomıka jáne bıýdjettik josparlaý mınıstrligine múddeli memlekettik organdarmen birlese, álemdik ekonomıkadaǵy úderisterdi eskere otyryp, elimizdiń makroekonomıkalyq kórsetkishterine udaıy monıtorıng jáne saraptama jasaýdy júktedi. «Qajet bolsa, qoldanystaǵy daǵdarysqa qarsy baǵdarlamalarǵa túzetý engizýdi usynamyn. Budan bólek, Ekonomıka mınıstrligi Tabıǵı monopolııalardy retteý agenttigimen birlese otyryp, teńgerimdi tarıftik saıasatty qalyptastyrýdy jalǵastyrsyn. Qarjy mınıstrligi udaıy negizde bıýdjettik qarajattyń tıimdi paıdalanylýy men ıgerilý jaǵdaıyna baqylaý jasaýy qajet. Memlekettik organdar bólingen qarajattyń tıimdi atqarylýy men salalyq baǵdarlamalardyń oryndalýyn qaperde ustasyn», - dedi Úkimet basshysy.
Sonymen qatar, Premer-Mınıstr Ekonomıka jáne bıýdjettik josparlaý mınıstrligine aǵymdaǵy jyldyń 1 qyrkúıegine deıin Parlament Májilisine 2014-2016 jyldarǵa arnalǵan úsh jyldyq bıýdjet jobasyn jáne ekonomıkalyq damý boljamyn usynýdy tapsyrdy.
