Premer-Mınıstr ekonomıka salasyndaǵy basty mindetterdi aıtty
«Úkimettiń aldynda turǵan basty mindet – eldiń áleýmettik-ekonomıkalyq damýyn qamtamasyz etip, halyqtyń turmys sapasyn jaqsartý. Qazirgi kezde Memleket basshysynyń Saılaýaldy baǵdarlamasy iske asyrylyp jatyr. Sonymen qatar, biz Parlamenttegi basym kópshilik – «Amanat» partııasynyń baǵdarlamasyn oryndaýǵa kiristik. Prezıdenttiń aýqymdy saıası reformalarynyń arqasynda Májiliske 6 partııa ótti. Biz barlyq partııalarmen birge belsendi jumys isteımiz. Bul bizdiń jumysymyzǵa oń nátıje beretini sózsiz», - dedi Á.Smaıylov Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde.
Onyń aıtýynsha, Úkimet ashyq ári ózin-ózi tolyqtaı qamtamasyz etetin naryqtyq ekonomıka qurý jolynda naqty sharalardy iske asyrady.
«Bizdiń aldymyzda bıyl ekonomıkalyq ósimdi 4%-ke, al orta merzimdi perspektıvada 5%-ke deıin jetkizý mindeti tur. Ekonomıkalyq saıasat birinshi kezekte, bıznesti qoldaýǵa baǵyttalýy tıis. Bul oraıda, negizgi salalarǵa tartylatyn otandyq jáne sheteldik ınvestıtsııalardyń kólemin ulǵaıtýymyz kerek. Sonymen qatar, jyl sońyna qaraı ınflıatsııany 2 ese tómendetýge, eksporttyq áleýetti, jańa tehnologııalardy damytýǵa, zańnamany odan ári jetildirýge baǵyttalǵan naqty sharalardy iske asyrýǵa erekshe nazar aýdarý qajet. Bizdiń mindetimiz – ınflıatsııany eskere otyryp, halyqtyń jalaqysynyń 4,6% deńgeıinde naqty ósýin qamtamasyz etý. Jumyssyzdyq 4,8%-ke deıin tómendeýi tıis. Osy kórsetkishterge qol jetkizý úshin biz bar kúsh-jigerimizdi biriktirýimiz qajet», - dedi Úkimet basshysy.
