Premer-Mınıstr: EAEO aıasynda kedergiler men shekteýlerdi joıýǵa baǵyttalǵan Jol kartasy ázirlenedi

ASTANA. QazAqparat - EAEO aıasynda kedergiler men shekteýlerdi joıýǵa baǵyttalǵan Jol kartasy ázirlenedi. Búgin Bishkekte QR Premer-Mınıstri Baqytjan Saǵyntaev Eýrazııalyq úkimetaralyq keńestiń keńeıtilgen quramdaǵy otyrysynda sóılegen sózinde osylaı málim etti, dep habarlaıdy QazAqparat pm.kz saıtyna silteme jasap.

Sóz barysynda Qazaqstan Úkimetiniń basshysy Eýrazııalyq ekonomıkalyq odaqtyń eki jyldan astam ýaqytta tıimdi ıntegratsııalyq birlestik retinde ornyqqanyn atap ótti.

«Degenmen bul jyldar bizdiń elderimiz úshin ońaı bolǵan joq. Syrtqy qozǵaýshy kúshterdiń yqpaly, jahandyq qarjylyq jáne taýar naryqtarynyń turaqsyzdyǵy baıqaldy. Osyǵan oraı, Odaqtyń JІÓ kólemi 0,7%-ǵa tómendedi. Bizdiń ózara saýda aınalymymyz 11%-ǵa azaıdy. Osyndaı kezeńde ózara is-qımyldy nyǵaıtý, elder arasyndaǵy saýdany damytýdyń jańa tıimdi quraldaryn qalyptystyrý boıynsha ortaq kúsh-jigerdi shoǵyrlandyrý mańyzdy», - dep atap ótti B. Saǵyntaev.

Úkimet basshysynyń aıtýynsha, bul baǵyttaǵy mańyzdy másele  kedergiler men shekteýlerdi joıý bolyp tabylady.

«Bul jumysty júıeli ári kezeń-kezeńimen júrgizgen jón. Atalǵan baǵytta memleketterdiń sarapshylary men komıssııa edáýir jumystar atqardy. 60-tan astam kedergiler men shekteýlerdiń tizilimi úılestirildi. Aldaǵy ýaqytta olardy joıýǵa baılanysty Jol kartalary ázirlenetin bolady. Bul bizdiń kásiporyndarymyzǵa ortaq naryqtarǵa shyǵý jolyn jeńildetip, sonymen qatar olardyń damýyna qosymsha jaǵdaılar jasaıdy», - dedi Qazaqstan Úkimetiniń basshysy.