Premer-Mınıstr: Daǵdarys bizdi tóńirektep júr
ASTANA. QazAqparat - Daǵdarys bizdi tóńirektep júr. Búgin QR Parlamenti Palatalarynyń birlesken otyrysynda QR Premer-Mınıstri Kárim Másimov osylaı málim etti. Eske sala keteıik, birlesken otyrysta Úkimettiń byltyrǵy jylǵy bıýdjettiń atqarylýy týraly esebi talqylanǵan bolatyn.
«2007-2008 jyldardaǵy, 2009-2010 jyldardaǵy daǵdarystardyń bir birinen birshama aıyrmashylyqtary bar. 2007-2008 jylǵy jahandyq daǵdarys eń aldymen amerıkalyq naryqta paıda boldy, bárimiz sýbstandartty kredıtter, qarjylyq sektor týraly bilemiz. Odan keıingi kezeńdegi daǵdarys eýropalyq naryqtaǵy, Eýropa memelketterindegi boryshtyq mindettemelermen tikeleı baılanysty. Al qazirgi 2014-2015 jyldary damýshy elderdiń ýaqyty da kelgen tárizdi. Eń birinshi bul bizdiń aınalamyzdaǵy elderdiń rynoktary: Reseı, Qytaıǵa da qatysty», - dedi K. Másimov. Bul rette Úkimet basshysy Reseı ekonomıkasynyń báseńdegenin, Qytaı qarqyny da tómendep turǵanyn alǵa tartty. Premerdiń sózine qaraǵanda, bul daǵdarys tolqyny atalǵan elderdiń kompanııalar qyzmetine de, iri taýar óndirýshilerge de áser etpeı qoımaıdy. «Biz bes aıdyń qorytyndysynda da negizgi taýar óndirýshilerimizdiń Reseıge, basqa elderge eksportynda birshama ózgerister oryn alyp otyrǵanyn baıqaımyz. Al bul quldyraýdyń jaǵymsyz saldarynan qutylý úshin biz óz jumysymyzdy tórt baǵyt boınysha josparlap otyrmyz. Onyń birinshisi - bizdiń dástúrli ekonomıka sektoryn qoldaý. Sońǵy 2,5 jarym jylda biz elimizdiń barlyq taýar óndirýshilermen kezdestik. Olardyń suraqtaryn tyńdap shyqtyq, sheshýge tıisti másele de bizge belgili», - dedi K. Másimov.
Budan bólek, Úkimet basshysy ekinshi baǵyt retinde óńdeýshi ónerkásip sektoryn atady. Bul rette Memleket basshysy Ulttyq qordan 1 trln. teńge qarajat bólý týraly teńdessiz sheshim qabyldaǵany este. Bunyń basym bóligi óńdeýshi ónerkásipti qoldaýǵa baǵyttalatyn bolady.
«Úshinshi baǵyt - ınnovatsııalyq, ǵylymı qamtymdy ekonomıkany damytý. Bul - keleshek ekonomıkasy, odan birden nátıje kútýge de kelmeıdi. Sondyqtan da, onyń qaıtarymy da keleshektiń úlesinde. Tórtinshi baǵyt - qyzmet kórsetý sektory men shaǵyn jáne orta bıznesti damytý. Bunda da biz osy baǵyt úshin tyń serpin qadamdaryn jasaýǵa tıispiz. Shaǵyn jáne orta bıznes úshin protsedýralardy jeńildetip, qarjylandyrýdyń qosymsha arnalaryn asha túsýge tıispiz. Halyqarlyq qarjy quraldaryn da tartamyz, jumys jalǵasýda. Dál osy tórtinshi baǵyt jumys oryndaryn qurýdyń negizgi fokýsy. Shaǵyn jáne orta bıznes pen qyzmet kórsetý salasy damýǵa dem bere alady», - dedi Kárim Másimov.
