Premer-mınıstr tsıfrlyq saýattylyqty arttyrý baǵdarlamalaryn jańartýdy tapsyrdy
Búgingi Úkimet otyrysynda tsıfrlyq saýattylyqty arttyrý maqsatynda Bilim jáne ǵylym, Eńbek jáne halyqty áleýmettik qorǵaý, Aýyl sharýashylyǵy, Densaýlyq saqtaý, Aqparat jáne kommýnıkatsııalar mınıstrlikteriniń baıandamasy oqyldy. Tsıfrlandyrý turǵysynda atqarylǵan jáne atqarylatyn sharýalar barshylyq. Máselen, Aýyl sharýashylyǵy mınıstrligi Qazaqstanda aýyl sharýashylyǵy sýbsıdııalaryn alý boıynsha barlyq memlekettik kórsetiletin qyzmetter jyl sońyna deıin avtomattandyrylatynyn habarlap otyr.
Esepterdi tyńdaı kele Úkimet basshysy atalǵan baǵytta jumysty jalǵastyrý kerektigin atap ótti.
«Aıtylǵan baıandamalardy eskere otyryp, Aqparat jáne kommýnıkatsııalar mınıstrligine, múddeli memlekettik organdarmen, óńirlerdiń ákimderimen birlesip, halyqty tsıfrlyq saýattylyqqa oqytýdy odan ary jalǵastyrýdy jáne «Tsıfrlyq Qazaqstan» memlekettik baǵdarlamasynyń mindetterin eskere otyryp, josparly ındıkatorlardy qaıta qaraýdy tapsyramyn. Bilim jáne ǵylym mınıstrligine, Aqparat jáne kommýnıkatsııalar mınıstrligi jáne Eńbek jáne halyqty áleýmettik qorǵaý mınıstrlikterimen, ózge de múddeli memlekettik organdarmen saladaǵy qajettilikti eskere otyryp, mamandardy oqytý jáne tsıfrlyq saýattylyǵyn arttyrý baǵdarlamalaryn jańartýdy júkteımin. Asqar Qýanyshuly, jumys sizdiń baqylaýyńyzda», - dedi Úkimet basshysy.