Premer-Mınıstr «Bolashaq» ustanymy boıynsha oqytýshylardyń biliktiligin arttyrýǵa arnaıy baǵdarlama ázirleýdi tapsyrdy
ASTANA. 18 sáýir. QazAqparat /Rýslan Ǵabbasov/ - Úkimet basshysy Kárim Másimov «Bolashaq» ustanymy boıynsha bilim berý granttary esebinen oqytýshylardyń biliktiligin arttyrý aıasynda arnaıy baǵdarlama ázirleýdi tapsyrdy.
Bundaı tapsyrmany Premer-Mınıstr búgin Úkimet otyrysynda júktedi.
Kadrlyq rezerv máselesin Premer-Mınıstrdiń orynbasary Erbol Orynbaev qadaǵalaıtynyna toqtalǵan K. Másimov, «Elbasy Astanada, Aqtóbe, Shymkentte, Almatyda álemdik deńgeıdegi kásibı-tehnıkalyq kolledjderdi qurýdy tapsyrdy. Bilim jáne ǵylym mınıstrligi ákimdermen birlese 1 aılyq merzimde tıisti usynystar engizedi»,-dedi.
Sonymen qatar Úkimet basshysy «Bolashaq» baǵdarlamasyn júzege asyrý boıynsha Bilim jáne ǵylym mınıstrligi 1 aıdyń ishinde osy turǵyda tıisti usynystardy Úkimettiń qaraýyna engizetinin aıtyp ótti. «Atap aıtqanda, bul turǵyda kadrlarǵa degen qajettilik, kadrlyq rezervti qalyptastyrý, túlekterdi eńbekpen qamtý máseleleri qamtylýy tıis»,-dedi K. Másimov.
Sonymen qatar Úkimet otyrysynda bir aptalyq merzimde zııatkerlik mektepter jumysynyń tájirıbesin taratý boıynsha usynystardy zerdeleý júkteldi.
