Premer-mınıstr basqaratyn Avtonomdyq klasterlik qor qurylady

ASTANA. 24 qyrkúıek. QazAqparat - Búgin Parlament Májilisinde «Innovatsııalyq tehnologııalar parki» ınnovatsııalyq klasteri týraly» jáne «QR keıbir zańnamalyq aktilerine «Innovatsııalyq tehnologııalar parki» ınnovatsııalyq klasteri máseleleri boıynsha ózgerister men tolyqtyrýlar engizý týraly» zań jobalarynyń tanystyrylymy bolyp ótti.

Atalǵan qujat «Innovatsııalyq tehnologııalar parki» ınnovatsııalyq klasteriniń quqyqtyq mártebesin, arnaıy ekonomıkalyq aımaqtyń basqarý ereksheligin jáne osy arnaıy ekonomıkalyq aımaqty basqarý organynyń kommertsııalyq emes uıymǵa ótý joldaryn aıqyndaıdy.

Indýstrııa jáne jańa tehnologııalar birinshi vıtse-mınıstri Albert Raýdyń aıtýynsha, qujatty ázirleý barysynda ınnovatsııalyq klasterlerdi damytý salasyndaǵy halyqaralyq tájirıbege taldaý júrgizilip, Reseı, Belarýs, Frantsııa, Ońtústik Koreıa sekildi memleketterdiń arnaıy ekonomıkalyq aımaqtar jumysy zerttelgen.

Zań jobasymen «avtonomdyq klasterlik qor», «ınnovatsııalyq klaster», «ınnovatsııalyq klasterge qatysýshy» sekildi uǵymdar engizý kózdeledi. Bul rette kommertsııalyq emes uıym bolyp tabylatyn Avtonomdyq klasterlik qor Innovatsııalyq tehnologııalar parkiniń basqarýshy organy retinde qarastyrylady. Óz kezeginde Park ındýstrııalyq-ınnovatsııalyq qyzmetti yntalandyratyn ınnovatsııalyq klasterge qatysýshylardy biriktiredi. Al el Úkimetiniń basshysy jetekshilik etetin Basqarýshy komıtet quramyna quryltaıshylar ókilderi, ǵylym men pedagogıka salasynyń qyzmetkerler, qoǵamdyq birlestikter ókilderi, basqa da tulǵalar kire alady.