Premer-Mınıstr Azıadany joǵary deńgeıde uıymdastyrý jóninde tapsyrma berdi
A. Qańtardyń 19-y. QazAqparat /Ernur Aqanbaı/ - Premer-Mınıstr Kárim Másimov Týrızm jáne sport mınıstrligine 2011 jyly Astana men Almaty qalalarynda bolatyn VII qysqy Azııa oıyndaryn joǵary deńgeıde uıymdastyrýdy jáne Azıada úshin salynyp jatqan sporttyq nysandardyń qurylysyn der kezinde aıaqtaýdy tapsyrdy.
Ol bul tapsyrmany atalmysh mınıstrliktiń búgingi keńeıtilgen alqa májilisinde berdi, dep habarlaıdy QazAqparat.
«2011 jylǵy qańtardyń 30-ynda bizdiń elimizdiń aýmaǵynda tuńǵysh ret qysqy Azııa oıyndary bastalady. Mundaı sporttyq shara Qazaqstanda buryn-sońdy ótkizilgen joq. Bul biz ótkizgeli otyrǵan eń joǵary deńgeıdegi sporttyq shara. «Barlyq nysandardy der kezinde aıaqtaý qajet. Komıssııanyń otyrysynda bul máseleni sóz ettik. Memleketimizdiń qýatyn taǵy bir márte kórsetý jáne elimiz mundaı sharany ótkize alatynyn dáleldeý úshin uıymdastyrý sharalaryn laıyqty jáne joǵary deńgeıde ótkizýimiz kerek. Bul Sizdiń, Astana men Almaty qalalary jáne Almaty oblysy ákimderiniń jeke jaýapkershilikterińizde bolady. Barlyq nysandardyń qurylysyn muqııat baqylańyzdar. Ýaǵdalasqanymyzdaı taıaý ýaqytta biz ol nysandardy aralap kóretin bolamyz», dedi alqada Úkimet basshysy mınıstr Temirhan Dosmuhametovke qaratyp aıtqan sózinde.
Premer-Mınıstr Azııadany laıyqty deńgeıde ótkizý asa mańyzdy ekenin atap kórsetti. «Barlyq uıymdastyrý sharalary joǵary deńgeıde bolýy tıis. Sebebi, osynyń barlyǵyna búkil álem kóz tigetin bolady. Qazaqstan quramasy tyńǵylyqty daıyndalyp, Azııadada laıyqty óner kórsetýi tıis. Álemge bizdiń sportshylardyń múmkindigin, halqymyzdyń áleýetin kórsetýimiz kerek», dedi K. Másimov. Úkimet basshysynyń pikirinshe, Azıada tek sporttyq qana emes, sonymen qatar saıası másele bolyp tabylady.
