Premer-Mınıstr asyl tuqymdy mal basyn ósirýge arnalǵan ınfraqurylymdy daıarlaýǵa jiti nazar aýdarýdy tapsyrdy

Úkimet basshysy elimizdegi iri qara mal etiniń eksporttyq áleýetin damytý baǵdarlamasy iske asyrylatynyn aıta kele: «Bul baǵytqa negizdelgen sharalarǵa «QazArgo» holdınginde qajetti qarjy bar. Al sýbsıdııalaý turǵysynda qosymsha resýrstar qajet bolsa, onda 2011 jyldyń bıýdjetin naqtylaý kezinde eskerýimiz qajet», -dedi.

Shetelden satyp alynatyn iri qara máselesine toqtalǵan K. Másimov: «Shetelden satyp alynatyn asyl tuqymdy mal elimizdiń klımatyna, jem-shóbine beıimdelgen bolýy tıis»,-dedi.

Sonymen qatar Úkimet basshysy elge jetkiziletin mal basyn kútip-baǵýǵa tyńǵylyqty qaraý kerektigin aıtyp ótti. Buǵan qosa asyl tuqymdy iri qaraǵa qaraıtyn adamdardyń biliktiligine, ınfraqurylymǵa nazar aýdarý kerektigin jetkizdi.

Premer-Mınıstrdiń paıymdaýynsha, eksportqa negizdelgen mal sharýashylyǵyn damytý aıasynda jaıylymdardaǵy sý máselesin de sheshý kerek. «Eger de bul jobany aıaǵyna deıin iske asyrsaq, elimizde osy baǵytta tolyq ındýstrııa paıda bolady. Sondyqtan da qurylys pen ındýstrııalandyrýda jasaǵan «jol kartasy» sekildi bul salada da tıisti qadamdar qajet bolady»,-dedi K. Másimov.

Osy oraıda keńes sońynda Premer-Mınıstr birinshi orynbasary Ómirzaq Shókkevke iri qara mal etiniń eksporttyq áleýetin damytý boıynsha jumystardy úılestirýdi júktedi.

«QazAgro» holdınginiń málimetine qaraǵanda, atalǵan joba aıasynda aldaǵy 5 jylda 150 myń basqa arnalǵan 60-qa jýyq bordaqylaý alańdary qurylady. Sonymen qatar 72 myń mal basyna negizdelgen 54 sharýashylyq-reprodýktorlar, 2,5 myńǵa deıin fermerlik sharýashylyqtary qurylady. Bul óz kezeginde jylyna 60 myń tonna kólemindegi eksportqa baǵyttalǵan etti óndirýge múmkindik beredi.Esepteýler boıynsha aldaǵy 5 jylda jobany qarjylandyrýǵa jumsalatyn qarjy kólemi 148 mlrd. teńge kóleminde bolmaq. Qarjy kózderi retinde respýblıkalyq bıýdjet jáne holdıngke Ulttyq qor tarapynan bólingen qarjy ıgerilmek.