Premer-Mınıstr: Asqar Zabıkýlınniń erligi - urpaqqa úlgi

ASTANA. QazAqparat – Búgin Úkimet otyrysynda QR Premer-Mınıstri Álıhan Smaıylov órt sóndirýshi Asqar Zabıkýlınniń otbasyna kóńil aıtty, dep habarlaıdy QazAqparat tilshisi.

«Qyzmettik boryshyn atqarý kezinde aýyr jaraqat alyp, aýrýhanada dúnıeden ótken elordalyq órt sóndirýshi Asqar Zabıkýlınniń otbasy men jaqyn týystaryna kóńil aıtamyz. Onyń esimi el esinde máńgi saqtalady. Asqar Zabıkýlınniń erligi - urpaqqa úlgi», - dedi Álıhan Smaıylov Úkimet otyrysynda.

Aıta keteıik, Memleket basshysynyń tapsyrmasy boıynsha erjúrek órt sóndirýshiniń esimin máńgi este saqtaý maqsatynda Astana qalasyndaǵy kóshelerdiń birine Asqar Zabıkýlınniń esimi berilip, bıýsti ornatylady.

Eske sala keteıik, elordada kópqabatty úıde órt bolyp, 3 adam, onyń ishinde 1 bala aýrýhanaǵa tústi.

Al 3 adamdy qutqarǵan astanalyq órt sóndirýshi Asqar Zabıkýlındi 80% kúıik shalyp, jansaqtaý bólimine jatqyzyldy.

Odan bólek, Memleket basshysy erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.

Denesiniń 80 paıyzyn kúıik shalǵan órt sóndirýshi aýrýhanada qaıtys boldy.

Foto: gov.kz