Premer-Mınıstr: Arnaıy ekonomıkalyq aımaqtar tikeleı mindetterin oryndamaı otyr
«Óńdeý ónerkásibin damytý úshin baǵasy qoljetimdi shıkizatpen qamtamasyz etý arqyly óńdeý óndiristerin qurýdy yntalandyrý qajet. Búgingi tańda Úkimet taý-ken metallýrgııa kesheniniń iri kásiporyndarymen birlesip, olardyń aınalasynda shaǵyn jáne orta kásiporyndar qurý máselesin pysyqtap jatyr. Indýstrııa mınıstrligine taý-ken metallýrgııa kesheni kásiporyndarymen birlesip, óńdeý deńgeıi orta jáne joǵary ónimder shyǵaratyn óndiristerdi qurýdy yntalandyrý boıynsha keshendi sharalar ázirleýdi tapsyramyn», - dedi Premer-Mınıstr.
Álıhan Smaıylov Prezıdent qomaqty bıýdjettik qarjylandyrýǵa jáne memlekettik qoldaý sharalaryna qaramastan, arnaıy ekonomıkalyq aımaqtardyń el ekonomıkasyna qosyp otyrǵan úlesi tómen ekenin atap ótkenin eske saldy.
«Basqarýshy kompanııalardyń jumysy tıimsiz. Investorlar arnaıy ekonomıkalyq aımaqtarǵa kirý, qajetti ınfraqurylymnyń bolmaýy, basqarýshy kompanııalardyń salǵyrttyǵy sııaqty únemi túrli kedergilerge tap keledi. Ýákiletti memlekettik jáne jergilikti atqarýshy organdar tarapynan tıisti baqylaý men úılestirý joq. Shyndap kelgende, ınvestıtsııalar tartýy tıis arnaıy ekonomıkalyq aımaqtar ózderiniń tikeleı mindetterin oryndamaı otyr», - dedi ol
Sondyqtan Úkimet basshysy arnaıy ekonomıkalyq aımaqtardyń jumys isteý mehanızmderin túbegeıli qaıta qarap, barlyq jobalar men qatysýshylarǵa tekserý júrgizý kerektigin basa aıtty.
«Jaǵdaıdy túzetýge ýaqyt óte tyǵyz. Sondyqtan Indýstrııa mınıstrligine múddeli memlekettik organdarmen jáne uıymdarmen birge tıisti jumys tobyn quryp, 1 naýryzǵa deıin osy máseleler boıynsha, onyń ishinde qajetti zańnamalyq túzetýlerge qatysty naqty usynystar ázirleýdi tapsyramyn», - dedi Álıhan Smaıylov.
