Premer-Mınıstr árbir qazaqstandyqqa tıesili baspananyń kólemin arttyrýdy tapsyrdy
"Memleket basshysynyń tapsyrmasy boıynsha 2030 jylǵa deıin árbir qazaqstandyqty turǵyn-úımen qamtý kórsetkishin 30 sharshy metrge arttyrýǵa qatysty usynystardy bir aıdyń ishinde berýdi tapsyramyn. Kerek bolsa "Nurly jer" baǵdarlamasyna tıisti ózgeristerdi engizeıik", - dep atap kórsetti Baqytjan Saǵyntaev Úkimettiń búgingi otyrysynda.
Budan bólek, Premer-Mınıstr qala qurylysy men jobalaý barysynda jańa ádisterdi, zamanaýı materıaldardy qoldanýǵa basa nazar aýdaryp, ǵımarattardyń ekologııalyq tazalyǵyna jáne energııalyq tıimdiligine joǵary talap qoıý qajettigin jetkizdi. "Budan bólek, salynatyn jáne salynǵan nysandardy ıntellektýaldy basqarý júıelerimen jabdyqtaý tetikterin ázirleý kerek. Bunyń barlyǵyna mınıstr Qasymbek jaýapty bolady", - dedi B.Saǵyntaev.
Aıta keteıik, bıylǵy Joldaýda QR Prezıdenti Nursultan Nazarbaev baspanamen qamtý kórsetkishin arttyrýdy tapsyrdy. "Sońǵy 10 jylda bir turǵynǵa shaqqanda 30 protsentke ósip, búginde 21,6 sharshy metrdi qurady. Bul kórsetkishti 2030 jyly 30 sharshy metrge deıin jetkizý kerek", - delingen qujatta.
