Premer-Mınıstr Almaty qalasynyń jańa ákimin tanystyrdy
Asqar Mamın máslıhat depýtattaryna Memleket basshysynyń qala ákimi qyzmetine Baqytjan Saǵyntaevty taǵaıyndaý týraly hatyn oqyp berdi. Depýtattar usynylǵan kandıdatýrany biraýyzdan maquldady.
Almatyda QR Úkimetiniń basshysy qala aktıvimen kezdesý ótkizdi.
QR Premer-Mınıstri A. Mamın B. Baıbekke 4 jylǵa jýyq ýaqyt boıy ákim qyzmetinde qalanyń damýyna qosqan zor úlesi úshin alǵys bildirdi.
«Baýyrjan Baıbektiń basshylyǵymen Almaty qalasynda úlken áleýmettik-ekonomıkalyq, ınfraqurylymdyq reformalar, týrızm salasyndaǵy jobalar júzege asty. Osynyń arqasynda qalanyń damýyna serpin berildi», - dedi A. Mamın, ekonomıkanyń negizgi salalary boıynsha oń dınamıka kórsetilgenin atap ótip.
Megapolıstiń jańa ákimin tanystyrý kezinde Asqar Mamın Baqytjan Saǵyntaevtyń jaýapty basshylyq qyzmetterdegi úlken tájirıbesin atap ótti.
«Baqytjan Ábdiruly - tájirıbesi úlken, kásibı basshy. QR Prezıdenti Ákimshiliginiń basshysy, Memlekettik hatshy, Premer-Mınıstr, Premer-Mınıstrdiń birinshi orynbasary qyzmetinde elimizdiń damýyna zor úles qosty», - dedi A. Mamın. B. Saǵyntaev sonymen qatar «Nur Otan» partııasy tóraǵasynyń birinshi orynbasary, Pavlodar oblysynyń ákimi, ekonomıkalyq damý jáne saýda mınıstri qyzmetterin atqardy. 
QR Úkimetiniń basshysy Prezıdenttiń Almaty qalasynyń basshylyǵy aldynda aýqymdy mindetterdi qoıyp otyrǵanyn atap ótti. Almaty - elimizdiń iri iskerlik, qarjylyq, ınnovatsııalar men ınvestıtsııalar, sondaı-aq, bilim berý jáne mádenı ortalyǵy. Almaty qalasy respýblıkanyń jalpy ishki ónimniń besinshi bóligin qamtamasyz etedi.
«Halyqtyń áleýmettik jaǵdaıyn, turmys sapasyn jaqsartýǵa basa kóńil bólý qajet. Qala ekonomıkasynyń jáne ınfraqurylymynyń odan ári damýyn qamtamasyz etý qajet», - dep Asqar Mamın, jańa ákimniń QR Tuńǵysh Prezıdenti - Elbasy Nursultan Ábishuly Nazarbaevtyń Almaty qalasyn damytý boıynsha alǵa qoıǵan barlyq strategııalyq mindetterdi tıimdi oryndaıtynyna jáne Memleket basshysy Qasym-Jomart Toqaevtyń Almatyǵa jaqyndaǵy jumys sapary barysynda bergen tapsyrmalaryn naqty sheshetinine senim bildirdi.
