Premer-Mınıstr: Áleýmettik reformalardy halyqqa durys túsindirý qajet
«Múmkindigi shekteýli adamdardyń ómir súrý sapasyn jaqsartý maqsatynda Múgedektigi bar adamdardyń quqyqtaryn qamtamasyz etý jónindegi is-sharalar josparyn tıimdi júzege asyrý kerek. Búgingi tańda osyndaı 57 myńnan astam adam proaktıvti syrttaı formatta kýálandyryldy. Bul múgedektikti belgileý boıynsha kórsetilgen memlekettik qyzmetterdiń 23 paıyzyn quraıdy. Táýelsiz sarapshylardy tarta otyryp, múgedektik anyqtalǵan kezde medıtsınalyq-áleýmettik saraptama júıesin odan ári jetildirýdi jalǵastyrý qajet. Sondaı-aq áleýmettik qyzmet kórsetý júıesin jańǵyrtý aıasynda áleýmettik qyzmet kórsetetin ınternat-úılerin kezeń-kezeńimen keńeıtý kerek. Ár óńirde syıymdylyǵy shaǵyn úılerdi ashý boıynsha pılottyq jobany iske qosý mańyzdy», - dedi Úkimet basshysy búgin Eńbek jáne halyqty áleýmettik qorǵaý mınıstrliginiń keńeıtilgen alqa májilisinde.
Premer-Mınıstr mınıstrlik jumysynyń barlyq baǵyty boıynsha júrgizilip jatqan áleýmettik reformalardy halyq durys túsinip, qabyldaýy úshin túsindirý jumystaryn belsendi jalǵastyrý qajettigine nazar aýdartty.
«Memleket basshysynyń barlyq tapsyrmalaryn oryndaý boıynsha mindetter mınıstrliktiń damý josparyna engizilýi tıis. Bul qujat osy aıdyń sońyna deıin qabyldanýy kerek. Jalpy mınıstrlik elimizdiń áleýmettik-eńbek saıasatyn qalyptastyrý men ony iske asyrý boıynsha óziniń úılestirýshi rólin kúsheıtý kerek», - dedi Álıhan Smaıylov.
