Premer-Mınıstr Aqtóbeniń Hromtaý aýdanyndaǵy fabrıkaǵa bardy

AQTÓBE. QazAqparat – Aqtóbe oblysyna jumys sapary barysynda Premer-Mınıstr Álıhan Smaıylov Hromtaý aýdanynda ashylǵan Dóń taý-ken baıytý kombınatynyń shlamdaryn óńdeýmen aınalysatyn «Qazhrom» TUK» AQ biregeı baıytý fabrıkasynyń jumysymen tanysty, dep habarlaıdy QazAqparat Úkimettiń baspasóz qyzmetine silteme jasap.

Jyl saıyn hrom kenin maıdalaý protsesinde Dóń taý-ken baıytý kombınatynda shamamen 900 myń tonna shlam jınalady.

Qazirgi ýaqytta jalpy kólemi 14,5 mln tonnany quraıtyn onyń quramynda 35%-ǵa deıin hrom oksıdi bar.

Ozyq standarttar boıynsha tehnologııalyq jáne avtomattandyrylǵan baıytý fabrıkasy shlamdardan gravıtatsııalyq ádispen hrom oksıdin alýǵa múmkindik beredi. Alynǵan taýar kontsentratynda kem degende 48,5% hrom oksıdi bolady.

Jalpy jańa kásiporyn jumys istep turǵan óndiristerdiń qaldyqtaryn jáne burynnan jınalyp kelgen shlamdy jylyna shamamen 1,7 mln tonna kóleminde qaıta óńdep otyrýǵa múmkindik beredi.

Premer-Mınıstr zaýyttyń jergilikti ekologııany jaqsarýǵa aıtarlyqtaı úles qosatynyn atap ótti.

«Bul jobanyń mańyzy zor. Eń bastysy – qaıta óńdeýden keıin qaldyqtardyń qoımalaryn qorshaǵan ortaǵa jáne halyqtyń densaýlyǵyna zııan keltirmeıtindeı etip, barlyq ekologııalyq standartqa sáıkes qalpyna keltirý qajet. Úkimet osy jáne basqa da shıkizatty qaıta óńdeý jobalaryna jan-jaqty qoldaý kórsetetin bolady», - dedi Álıhan Smaıylov.