Premer-Mınıstr 2014 jyldan bastap ishki naryqtyń janar-jaǵarmaıǵa suranysyn otandyq óndirispen qamtamasyz etýdi tapsyrdy
ASTANA. Qańtardyń 15-i. QazAqparat /Ernur Aqanbaı/ - Premer-Mınıstr Kárim Másimov Energetıka jáne mıneraldyq resýrstar mınıstrliginiń aldyna 2014 jylǵy qańtardyń 1-nen bastap ishki naryqtyń janar-jaǵarmaıǵa suranysyn otandyq óndiristiń ónimderimen qamtamasyz etý mindetin qoıdy. Ol bul tapsyrmany atalmysh mınıstrliktiń búgingi alqa májilisinde berdi,
dep habarlaıdy QazAqparat.
Alqada elimizdegi munaı óńdeıtin úsh zaýytty jańǵyrtý ózekti másele ekenin aıtqan Úkimet basshysy: «Eki zaýyt boıynsha prıntsıpti sheshim qabyldandy. Atyraýda jumys bastalyp ketti, Shymkentte jumysty tezdetip qolǵa alý qajet. Pavlodarda kelissózge qol jetkizdik. Endigi mindet mynadaı: ýáde etkenderińizdeı, 2014 jylǵy qańtardyń 1-nen bastap ishki naryqtyń janar-jaǵarmaıǵa suranysyn otandyq óndiristiń ónimderimen qamtamasyz etýge tıispiz», dedi.
Bul oraıda, Premer-Mınıstr Memleket basshysynyń 2009 jyldyń jeltoqsanynda tómengi oktandy janar-jaǵarmaıdyń baǵasyn turaqtandyrý jónindegi mınıstrlikke bergen tapsyrmasy oryndalǵanyn jetkize kele, osylaı ilgerileý kerektigin aıtty. Budan bólek, Úkimet basshysy qazir janar-jaǵarmaı baǵasyn turaqtandyrýǵa qatysty zań jobasy ázirlenip jatqanyna toqtalyp, ony qazirgi naqtylyqty kórsetetindeı etip beıimdeý kerektigin atap ótti. «Biz depýtattardan osy úderisterdiń barlyǵyn zańdastyrýdy ótinemiz», dedi ol.
Úkimet basshysy janar-jaǵarmaı baǵasyn turaqtandyrýǵa qatysty halyqtyń kóńil-kúıi jaqsy ekenin jetkizdi. «Alaıda, arqany keńge salýǵa bolmaıdy, sál bosańsysaq, jaǵdaı kúrdelenip ketedi», dedi ol.
