Premer-Mınıstr 2010 jyly bank júıesiniń tólempazdyǵyn qamtamasyz etý jáne qurylys sektoryn turaqtandyrý jóninde usynys ázirleýdi tapsyrdy
dep habarlaıdy QazAqparat.
«Daǵdarysqa qarsy sharalardyń aıasynda 2007-2009 jyldary ekonomıkaǵa aıtarlyqtaı mol aqsha bólindi. 2010 jyly kenetten «ǵajaıyptyń» bolý yqtımaldyǵy jáne aqshanyń bizdiń bankterge ózendeı quıylatyny kúmándi. Sondyqtan, osyny jáne Strestik aktıvter qory aıasynda biz qabyldaǵan sheshimderdi eskerip, bank júıesiniń tólempazdyǵyn qamtamasyz etý jáne 2010 jyly otandyq bıznesti qalypty nesıeleý jóninde usynys ázirleý qajet», dedi otyrysta Premer-Mınıstr.
Sonymen qatar, Elbasy keshe qurylys sektoryn odan ári qalaı ilgeriletýdi pysyqtaý jóninde tapsyrma bergenin aıta kele: «Biz 2007-2009 jyldary negizinen nysandardyń qurylysyn salyp bitirý máselesin shuǵyl sheshtik jáne sheshimder tabysty boldy. Endi qurylys sektory keleshekte qalaı damıdy, qandaı kapıtal salý qajet degen máseleni pysyqtaýdy sizge tapsyramyn. Óıtkeni, saıyp kelgende oǵan qazir memleketten basqa eshkim kómektespeıdi», dedi Úkimet basshysy birinshi orynbasary Ómirzaq Shókeevke qaratyp aıtqan sózinde.
K. Másimov memleket tarapynan qurylys sektoryna kórsetilgen aýqymdy kómekke qaramastan ıpotekalyq nesıeleý salasynda, úlestik qurylys salasynda narazylar baryn atap ótti. «Men sizden ákimdermen, banktermen birlesip, osy máseleler týyndap otyrǵan óńirlermen, eń aldymen Astana men Almaty qalalarymen, Almaty jáne Aqmola oblystarymen jumys isteýdi ótinemin. Múmkindik bar jerde bizge shuǵyl sheshimder qabyldaý qajet. Biz resýrstardy bólgenimizben, sonda da máseleler týyndap jatsa, onda is sońyna deıin jetpeı jatyr degendik. Bul problemany bıyl jabý qajet. Buny Ómirzaq Estaıuly, Sizge júkteımin», dedi K. Másimov.
