Premer-lıga: «Jetisý» «Oqjetpesten» basym tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń segizinshi týrynda eki oıyn ótti, dep habarlaıdy QazAqparat tilshisi.
Alǵashqy kezdesý Taldyqorǵannyń «Jetisý» jáne Kókshetaýdyń «Oqjetpes» komandalary arasynda boldy. Ekeýi de bıylǵy dop dodasyn ala-qula ótkizip júr. Búgingi kezdesý taǵdyryn taldyqorǵandyq Oljas Kerimjanov 44-mınýtta soqqan jalǵyz gol sheshti. Osylaısha «Jetisý» 1:0 esebimen jeńiske jetti. Týrnır kestesinde 10 upaımen besinshi orynǵa kóterildi.
Taǵy bir kezdesýde Qaraǵandynyń «Shahter» jáne Jambyl oblysynyń «Taraz» komandalary sheberlik baıqasty. Oıyn tartysty órbidi. Birinshi kezeńde qaarǵandylyq klýb shabýyl shebinde jıi boı kórsetti.
Al ekinshi kezeńde «Taraz» qarsylastar qaqpasy mańynda kóbirek kórindi. Nátıjesinde olardyń qatarynan Valerıı Karshakevıch 50-mınýtta mergendik tanytty. «Shahter» sapynan Ýsman Mýhammed 90-mınýtta tarazy basyn teńestirip ketti. Oıyn 1:1 esebimen teń aıaqtaldy.
Atalǵan týrdaǵy qalǵan oıyndar 12 qyrkúıekte ótkiziledi. Bul kúni «Ordabasy» men «Astana», «Tobyl» men «Qyzyljar», «Qaırat» pen «Qaısar» komandalary jasyl alańǵa shyǵady.
Esterińizge sala ketelik, jetinshi týr oıyndarynan keıin el chempıonatynda azdaǵan úzilis boldy. Qyrkúıektiń alǵashqy aptasynda Qazaqstan quramasy Ulttar lıgasynda oıyn kórsetti.
