Premer-lıga: «Ordabasy» «Tobyldy» oısyrata jeńdi

ASTANA. QazAqparat - Fýtboldan Premer-lıga komandalary arasyndaǵy el birinshiliginiń 6-týry máresine jetti, dep habarlaıdy QazAqparat tilshisi.

Atalǵan týrdaǵy sońǵy oıynda Shymkentte jergilikti «Ordabasy» men «Tobyl» komandalary sheberlik baıqasty.

Komandalar týrnır kestesinde qatarlas keledi. Ekeýi de bıyl júldeli oryndardan úmitker. Sondyqtan jankúıerler olardan tartysty oıyn kútti.

Kezdesý barysynda shymkentik klýb sapynan Ashat Taǵybergen 21-mınýta esep ashsa, 22-mınýta oǵan «Tobyl» shabýylshysy Serj Deble bir golmen jaýap qaıyrdy.

Ekinshi kezeńde alań ıeleri qatarynan Bobýr Abdýhalıkov 72, Sergeı Malyı 76, Vsevolod Sadovskıı 86-mınýtta mergendik tanytty.

Osylaısha shymkenttik klýb qarsylasynan 4:1 esebimen basym tústi. Nátıjesinde týrnır kestesinde úshinshi orynǵa kóterildi.

Atalǵan týrda búgin «Qyzyljar» «Aqsýdy» 2:0, «Aqtóbe» «Atyraýdy» 4:0 esebimen tize búktirdi.

Eske salsaq, 15 sáýirde «Qaısar» «Jetisýdan» 2:0 esebimen basym tússe, «Kaspıı» «Oqjetpesti» 2:1, «Shahter» «Maqtaraldy» 3:0 esebimen jeńdi.

Endi 19 sáýirde Qazaqstan kýbogynyń 1/8 fınal oıyndary bolady.

Al jetinshi týr oıyndary 22 jáne 23 sáýir kúnderi ótkiziledi.