Premer-lıga: «Qaırat» teń túsip, «Astana» jeńiske jetti
ALMATY. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń on birinshi týrynda eki oıyn ótti, dep habarlaıdy QazAqparat tilshisi.
Alǵashqy oıyn Almatynyń «Qaıraty» men Kókshetaýdyń «Oqjetpes» komandasy arasynda boldy. Bul kezdesýde barlyǵy 6 gol soǵyldy. Aldymen 6-shy mınýtta «Oqjetpes» oıynshysy Plamen Dımov esep ashty. Oǵan almatylyq Neboısha Kosovıch 28, 38-mınýttarda eki golmen jaýap qaıyrdy.
Oıynnyń ekinshi kezeńiniń 46, 57-mınýttarynda kókshetaýlyq komanda sapynan Artem Dmıtrıev mergendik tanytty. Al 73-mınýtta «Qaırattyń» shabýylshysy Vagner Lav tarazy basyn teńestirdi. Kezdesý 3:3 esebimen teń aıaqtaldy.
Al elordalyq «Astana» men Taldyqorǵannyń «Jetisý» komandalary arasynda tartysty oıyn órbidi. Elordalyq klýb sapynan Jarko Tomashevıch 39, 65-mınýttarda qarsylastar qaqpasynan sańylaý tapty. Al 77-mınýtta «Astana» sapynan Abzal Beısebekov esepti ulǵaıta tústi. Oıynda elordalyqtar 3:0 esebimen jeńiske jetti.
Bul oıynnan keıin týrnır kestesinde «Qaırat» pen «Astana» arasyndaǵy upaı aıyrmashylyǵy tórt upaıǵa qysqardy. Qazir «Qaıratta» - 25, «Astanada» - 21 upaı bar.
Sondaı-aq, atalǵan týrda 26 qyrkúıekte Jambyl oblysynyń «Tarazy» men Qostanaıdyń «Tobyly» arasyndaǵy kezdesýde jeńimpaz anyqtalǵan joq. Komandalar 0:0 esebimen teń tarqasty.
Atalǵan týrda 29 qyrkúıekte «Shahter» men «Kaspıı», «Qyzyljar» men «Qaısar» komandalary kezdesedi.
