Premer-lıga: «Ertis» pen «Atyraý» jeńiske jetti
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń 17-týry máresine jetti, dep habarlaıdy QazAqparat tilshisi.
Keshe atalmysh týrdaǵy eki oıyn ótkizildi. Qostanaıda jergilikti «Tobyl» elordanyń «Astana» komandasyna 0:2 esebimen jol berdi. Shymkenttiń «Ordabasy» klýby «Qaırattan» 1:0 esebimen basym tústi.
Búgingi oıyndar Tarazda jergilikti «Taraz» ben «Aqtóbe» kezdesýimen bastaldy. Eki komanda da týrnır kestesinde sońǵy oryndarda keledi. Sondyqtan búgingi kezdesýge ekeýi de bar kúshin saldy.
Bul oıynda 45-mınýtta «Taraz» oıynshysy Serj Nıýadzı esep ashsa, oǵan «Aqtóbe» sapynan 55-mınýtta Aslanbek Kákimov penaltıden jaýap qaıyrdy. Kezdesý 1:1 esebimen teń aıaqtaldy.
Pavlodar qalasynda jergilikti «Ertis» Kókshetaýdyń «Oqjetpesin» qabyldady. Eki komanda týrnır kestesinde qatarlas keledi. Qos komanda da búgin jeńiske jetýge kúsh saldy. «Ertis» oıynshysy Vıtas Ýroshtyń 50 men 74 mınýttarda soqqan qos golyna kókshetaýlyq shabýylshy Jasulan Moldaqaraev 52 mınýtta jalǵyz golmen jaýap qaıyrdy.
Qyzylordada jergilikti «Qaısar» men Qaraǵandynyń «Shahter» komandalary arasyndaǵy kezdesý 2:2 esebimen teń aıaqtaldy.
Aldymen qyzylordalyq klýb sapynan 17 mınýtta Ivan Graf, 29-mınýtta Kýle Mbombo gol soqty. Degenmen birinshi kezeńde «Shahter» bir gol soǵyp úlgerdi. Ony 35-mınýtta Erkebulan Nurǵalıev oryndady. Al 63-mınýtta tarazy basy teńesti. Qaraǵandylyq oıynshy Ivan Peshıch mergendik tanytty.
Sondaı-aq, Atyraý qalasynda jergilikti «Atyraý» men Taldyqorǵannyń «Jetisýyn» 2:1 esebimen tize búktirdi. Bul oıynda atyraýlyq klýb sapyna jaqynda ǵana qosylǵan Islamnur Abdýlavov esep ashsa, 61-mınýtta «Jetisý» qataryna taıaýda kelgen Aslan Darabaev tarazy basyn teńestirdi. Kezdesý taǵdyryn sheshken gol 63-mınýtta soǵyldy. «Atyraý» sapynan Alekseı Rodıonov osylaısha óz komandasyna jeńs syılady.
Al 18-týr oıyndary 13 jáne 14 shilde kúnderi ótkiziledi. 13 shildede «Jetisý» men «Ertis», «Aqtóbe» men «Shahter», 14 shildede «Ordabasy» men «Tobyl», «Oqjetpes» pen «Taraz», «Qaırat» pen «Qaısar» oınaıdy. Bul týrdaǵy bir oıyn aldyn-ala 3 sáýirde elordada «Astana» men «Atyraý» komandalary arasynda ótkizildi. Ol kezdesýde «Astana» 3:1 esebimen jeńiske jetti.
