Premer-lıga: «Astana» jeńilip, «Qaırat» teń tústi
NUR-SULTAN. QazAqparat - Búgin fýtboldan Premer-lıa komandalary arasyndaǵy Qazaqstan birinshiliginiń 15-týr oıyndary bolyp ótti, dep habarlaıdy QazAqparat tilshisi.
Atalmysh týrdaǵy negizgi kezdesý Shymkent qalasynda ótkizildi. Jergilikti «Ordabasy» elordalyq «Astana» komandasyn qabyldady. Kezdesýdiń 28-mınýtynda alań ıeleri qatarynan Mardan Tólebek esep ashsa, Mırzad Mehanovıch 36-mınýtta esepti ústemeleı tústi. Budan keıin 44-mınýtta «Astana» oıynshysy Marın Tomasov esep aıyrmasyn qysqartty. Ekinshi kezeńniń 47-mınýtynda shymkenttik Toqtar Jańǵylyshbaı mergendik tanytty. Oǵan «Astana» sapynan 75-mınýtta Roman Mýrtazaev bir golmen jaýap qaıyrdy. Oıyn 3:2 esebimen «Ordabasynyń» jeńsimen aıaqtaldy.
Týrnır kestesinde ekinshi orynda kele jatqan Qostanaıdyń «Tobyly» óz alańynda Kókshetaýdyń «Oqjetpesin» qabyldady. Atalmysh kezdesýde qostanaılyqtar qatarynan Senan Sebaı 58-mınýtta esep ashsa, 69-mınýtta Azat Nurǵalıev esepti ústemeleı tústi. «Tobyl» «Oqjetpesti» 2:0 esebimen tize búktirdi.
Qyzylordanyń «Qaısar» komandasy óz alańynda «Tarazben» kezdesti. Alań ıeleri sapynan Kýle Mvomba esep ashsa, 30-mınýtta Abzal Taýbaı tarazy basyn teńestirdi. Oıyn 1:1 esebimen teń aıaqtaldy.
Pavlodarda jergilikti «Ertis» pen Qaraǵandynyń «Shahter» , Almatyda «Qaırat» pen Taldyqorǵannyń «Jetisý» komandalary 0:0 esebine qanaǵat bildirdi.
Dál qazir Atyraýda jergilikti «Atyraý» men «Aqtóbe» komandalary arasyndaǵy kezdesýdiń birinshi kezeńi aıaqtaldy. Ázirge esep 1Ú1.
Endi 16-týr oıyndary 30 maýsym kúni ótkiziledi. Bul kúni «Aqtóbe» men «Ertis», «Astana» men «Qaırat», «Jetisý» men «Tobyl», «Oqjetpes» pen «Atyraý», «Ordabasy» men «Qaısar», «Shahter» men «Taraz» komandalary kezdesedi.
Esterińizge sala ketelik, sársenbi kúni Qazaqstan kýbogy fınalyna «Qaısar» jáne «Atyraý» komandalary joldama aldy.
