Preambýlada Qazaqstan memlekettiliginiń tarıhı sabaqtastyǵy anyq kórsetilgen — zańger
ASTANA. KAZINFORM — Halyq jerdiń tarıhı ıesi bolsa, egemendik pen memlekettilikke de zańdy quqyǵy bar. Bul — halyqaralyq quqyqtaǵy qaǵıda. Osy turǵydan qaraǵanda, jańa Konstıtýtsııa jobasy kirispesiniń ózi mańyzdy. Zań ǵylymdarynyń kandıdaty, QR Zańnama jáne quqyqtyq aqparat ınstıtýty Halyqaralyq quqyq jáne salystyrmaly quqyqtaný bóliminiń jetekshisi Dana Ábdákimova osyndaı pikir bildirdi.
Zańgerdiń aıtýynsha, jańa Konstıtýtsııa jobasynyń kirispesi aıryqsha nazar aýdarýǵa laıyq.
— Ádette, kirispe resmı bólim retinde ǵana qaralyp, aıtarlyqtaı mańyzdy dúnıe jazylmaıdy. Degenmen, bul joly Ata zań alǵashqy sóılemderden-aq júrekke jetti. Sebebi ádettegi qurǵaq, resmı mátin emes, memlekettiligimizdiń bet-beınesi, ózegi kórinis tapqan, — deıdi sarapshy.
Onyń sózinshe, qazaqtyń tarıhı jerinde, atamekeninde memlekettilikti nyǵaıtý jáne Uly daladaǵy myńdaǵan jyldyq tereń tarıhqa muragerlik jaıly tujyrymdar asa mańyzdy. Óıtkeni, bular Qazaqstannyń tamyry tym tereńnen bastaý alyp, úzilmeı jalǵasyp kele jatqanyn bildiredi.
— Kirispeniń ózi Qazaqstan memlekettiliginiń tarıhı sabaqtastyǵyn kúlbiltelemeı, ashyq ári naqty bekitedi. Negizinde, kez kelgen kózi ashyq adamǵa bul kúmánsiz aqıqat. Bizdiń memleketimiz aıaqastynan paıda bola qalǵan joq. Tarıhqa úńilsek, Uly dalada ártúrli bılik ınstıtýty, qoǵamdyq qurylym, quqyqtyq tártibi bar memleketter ómir súrdi. Demek, bizdiń jerimizde qazirgi memlekettik júıemiz ǵasyrlar boıy qalyptasyp, damyp keldi, — deıdi D. Ábdákimova.
Sarapshy kirispeniń, ásirese, halyqaralyq-quqyqtyq mánine aıryqsha toqtaldy.
Zamanaýı halyqaralyq quqyqta eldiń terrıtorııamen tarıhı baılanysy, ıaǵnı, jerge ejelden ıelik etýi egemendikke zańdy negiz ekenin bildiredi. Demek, kirispe Qazaqstandy syrtqy álemge qarsy qoımaıdy, kerisinshe, halyqaralyq quqyqta moıyndalǵan normany qoldanyp, túsindiredi. Memlekettiń óz terrıtorııasy men bolashaǵyna ıelik etýge, jaýapkershilik alýǵa zańdy quqyǵyn bekitedi.
Zańgerdiń aıtýynsha, mátinniń máni quqyq salasyndaǵy mamandarǵa ǵana emes, jalpy halyq úshin de qundy.
— Men úshin zańger retinde ǵana emes, jalpy adam, azamat retinde de bul óte mańyzdy. Óıtkeni, bul — ásheıin ádemi sózder ǵana emes, elińniń memlekettiligi jóninde nyq senimmen aıtý quqyǵy. Jańa Konstıtýtsııa jobasynyń kirispesi qujattaǵy resmı, qurǵaq sóz basy ǵana emes. Ol kúlli Ata zań mátininiń ózegi, — dep túıindedi Dana Ábdákimova.
Esińizge salaıyq, buǵan deıin zańgerler jańa Konstıtýtsııa adam quqyǵyn qorǵaý ınstıtýtyn nyǵaıtyp jatqany jóninde pikir bildirgen edi.
Alpamys Faızolla