Preambýla – bolashaq baǵdarymyzdyń irgetasy – Únzıla Shapaq
ASTANA. KAZINFORM – Preambýla – bizdiń ótken tarıhymyzdy dáripteı otyryp, bolashaqtaǵy baǵdarymyzdy aıqyndaıtyn irgetas. Bul týraly «Referendým-2026» onlaın marafonynda Májilis depýtaty, Konstıtýtsııalyq komıssııanyń múshesi Únzıla Shapaq aıtty.
– Preambýla – ótken tarıhymyzdy dáriptep qana qoımaı, elimizdiń bolashaqqa baǵyt alýyn naqty kórsetetin negizgi bólim. Burynǵy Konstıtýtsııanyń preambýlasymen qazirgi jobadaǵy preambýla arasynda aıtarlyqtaı aıyrmashylyq bar. Keıingi jyldary ǵalymdar men zertteýshiler preambýlaǵa erekshe nazar aýdarý kerektigin jıi kóterip júr, - dedi depýtat.
Ol atap ótkendeı, aldyńǵy Konstıtýtsııa qabyldanǵan kezde preambýlada jazylǵan qundylyqtar sol kezdegi azamattardyń sana deńgeıine saı qalyptasqan.
– Ýaqyt óte kele biz qazaq jerinde bolǵan memleketterdiń murasyn zań júzinde bekitip, qalyptasqan qundylyqtardy kórsetýdi basty maqsat ettik. Sonymen qatar Konstıtýtsııanyń adamǵa baǵyttalǵan bolýyn, birtutas qazaq múddesi turǵysynan qaralýyn basty nazarǵa ala otyryp, preambýlany jańashyl kózqaraspen jazdyq. Bul bolashaq azamattar úshin moraldyq irgetas bolady. Sonymen qatar qazirgi azamattardyń kózqarastary da ýaqyt óte ózgerdi, - dedi Únzıla Shapaq.
Depýtat jańa Konstıtýtsııa jobasynyń adam kapıtaly men ǵylymǵa negizdelgenin de atap ótti.
– Qazaqstanda ǵylymı zertteýlerdiń 27,4%-y kommertsııalandyrylyp, 118 mlrd teńgeden astam tabys ákelgen. Bul – bilim men ǵylymǵa salynǵan kapıtaldyń naqty dáleli. Memlekettiń baılyǵy endi adam kapıtaly arqyly ólshenedi. Sondyqtan Konstıtýtsııa jobasyn adamǵa bet burǵan dep aıtýǵa bolady. Biz adamnyń quqyqtary men bostandyqtaryn saqtap, onyń múmkindikterin tolyq ashýǵa jaǵdaı jasadyq. Naqty qundylyq – adam kapıtaly, al eń mańyzdysy – bilim, ǵylym jáne ınnovatsııalyq jetistikter, - dedi depýtat.
Únzıla Shapaq Ádiletti Qazaqstan qurýdaǵy negizgi prıntsıpterge de toqtaldy.
– Ádilet – kópqyrly uǵym. Áleýmettik ádilet, adamdar arasyndaǵy ádilet bar. Zań men tártipti ólshemge alsaq, qarym-qatynas ádiletti bolady. Quqyq ústemdigin ornatý úshin zań men tártip saqtalýy tıis, - dedi ol.
Aıta keteıik, Kazinform agenttiginiń YouTube arnasynda «Referendým-2026» atty onlaın-marafonyn tikeleı efırde kórsetip jatyr. Saǵat 12:00-de bastalǵan onlaın-marafon saǵat 18:00-ge deıin jalǵasady dep josparlanǵan.